Foto: Tengrinews.kz
Almatyda 10 jyl buryn jasalǵan qylmysqa qatysty aiyptaý úkimi shyqty, dep habarlaidy QazAqparat.
Qalalyq prokýratýra taratqan málimetke sáikes, qylmys 2012 jyly Almaty oblysynyń Qarasai aýdanynda bolǵan. Tóbeles kezinde er adam qarsylasyna birneshe ret pyshaq salǵan.
Derek boiynsha politseiler sotaldy tergeý amaldaryn bastaǵan. Alaida keiin qylmystyq is toqtatylǵan.
«Politsiia kúdikti bola tura, jaýapqa tartatyn tulǵanyń anyqtalmaýyna bailanysty qylmystyq isti negizsiz toqtatty. Osylaisha qylmysker jaýapkershilikten bosaǵan. Tek Naýryzbai aýdany prokýratýrasynyń aralasýynan keiin ǵana qylmystyq is qaita qozǵaldy. Osylaisha, Almatyda 2012 jyly bastalǵan qylmystyq iske qatysty zańdy qorytyndy shyqty», - dep habarlady qadaǵalaý organynan.
Prokýratýranyń talabymen, birqatar tergeý áreketteri júrgizilip, kúdiktige kisi óltirýge oqtaldy degen aiyp taǵylyp, ol qamaýǵa alyndy. Keiinnen qylmystyq isti prokýratýra sotqa joldady.
«Almaty qalasynyń qylmystyq ister jónindegi mamandandyrylǵan aýdanaralyq soty sottalýshy T.B. qatysty aiyptaý úkimin shyǵaryp, ol 6 jylǵa bas bostandyǵynan aiyrý túrindegi jaza taǵaiyndaýmen adam óltirýge oqtalǵany úshin kináli dep tanyldy», - dep atap ótti prokýratýra ókilderi.
Sondai-aq, prokýrorlar qylmyskerdi jaýapkershilikten bosatýǵa jol bergen politsiia qyzmetkerleriniń áreketine quqyqtyq baǵa berý úshin materialdardy Politsiia departamentiniń ishki qaýipsizdik bólimine joldady.
