Almaty oblysynyń 6 sportshysy biyl jazda Japoniia astanasy Tokioda ótetin Olimpiada oiyndarynda el namysyn qorǵaidy. 4 sportshy sadaq atýdan joldama jeńip alsa, bir sportshy grek-rim kúresinen jáne bir sportshy jeńil atletika boiynsha óner kórsetedi, dep habarlaidy "Ult aqparat".
Aldaǵy Tokio Olimpiadasyna oblys sportshylary 6 litsenziia utyp aldy. Olar – sadaq atýdan Sanjar Musaev, Denis Gankin, Ilfat Abdýllin, jeńil atletikadan Aiman Ratova, grek-rim kúresinen Ashat Dilmuhamedov. Sonymen qatar sadaq atý boiynsha bir komandalyq joldama oblys qorjynynda.
Keshe Taldyqorǵanda Almaty oblysynyń sport salasyndaǵy ótken jylǵy jetistikteri qorytyndylanyp, úzdikter marapattaldy.
Óńir basshysy marapattaǵandar qatarynda jeńil atlet Aiman Ratova da bar. Sporttyq júrýden el namysyn qorǵaityn atlet 2012 jylǵy London olimpiadasynan keiin turmysqa shyǵyp, bes jyl úlken sporttan qol úzip qalǵan. Eki balanyń anasy sportqa qaita oralǵanyna qýanyshty ekenin jasyrmaidy. Ol jýyrda Túrkiianyń Antaliia qalasynda ótken halyqaralyq jarysta júldeli úshinshi oryndy ielenip, Olimpiada litsenziiasyn jeńip aldy.
«Eń aldymen qazaq eliniń úmitin aqtaýǵa tyrysamyn. Ol úshin kóp eńbek ettik. Kóp ter tóktik. Áli de eńbek etý kerek. Maqsatyma jetemin degen úmittemin», - deidi sportshy.
Aita keteiik, ótken jyly jetisýlyq sportshylar 2537 medal jeńip alǵan, sonyń 906-sy – altyn, 709-y – kúmis, 922-si qola boldy.
Jyl saiyn jergilikti biýdjetten 108 úzdik sportshyǵa ai saiynǵy stipendiia tólenip otyrady. Sonyń ishinde 28 sportshy – múmkindigi shekteýli jandar.
