Búgin Premer-Ministrdiń orynbasary Roman Skliar Almaty oblysyna jasaǵan jumys sapary barysynda Taldyqorǵandaǵy qurylysy júrip jatqan mańyzdy áleýmettik nysandardy aralap, qurylys jumystarynyń barysymen tanysty, - dep habarlaidy "Ult aqparat".
Birinshi kezekte vitse-premer oblys ortalyǵyndaǵy 8 bólikten turatyn 200 adamǵa arnalǵan modýldi infektsiialyq aýrýhanaǵa at basyn burdy. Qurylys salasyndaǵy sońǵy úlgidegi jetistikterdi qoldana otyryp jyldam qarqynmen salynyp jatqan bul nysan óńir basshysy A.Batalovtyń tapsyrmasy boiynsha qazan aiynda aiaqtalýy tiis.
Qurylystyń basy-qasynda júrgen merdiger mekeme ókilderi men oblystyq qurylys jáne densaýlyq saqtaý basqarmalarynyń basshylary búgingi kúni qurylys jumystarynyń qansha protsenti aiaqtalǵandyǵyn, paidalanýǵa ótkizý merzimin, meditsina jabdyqtarynyń kezeń-kezeńimen jetkizilip jatqanyn, osy mekemede naýqastarǵa qyzmet kórsetetin mamandar (kadr máselesi) týraly baiandady.
Osydan keiin Roman Skliar álemdik deńgeidegi jarystardy ótkizýge arnalǵan aýmaǵy 27 myń sharshy metrdi quraityn jabyq júzý basseinine bardy. Nysannyń qurylysyn júrgizip jatqan mekeme ókiliniń habarlaýynsha, qurylys jumystaryn qazan, qarasha ailarynda tolyqtai aiaqtaý josparlanyp otyr.
Kelesi kezekte oblys ákimi úkimet basshysynyń orynbasaryna kottedjdi qalashyqta salynyp jatqan úilerdi kórsetti. Qala ákimi Ǵalymjan Ábdiraiymov búginde 71 turǵyn úi paidalanýǵa berýge daiyn turǵandyǵyn jáne taǵy 349 úi jyl sońyna deiin salynyp bitetindigin habarlady.
Vitse-premer óńirge sapary barysynda stýdentterge arnalǵan 13 qabatty 288 oryndyq jańa jataqhanaǵa baryp, stýdentterdiń turmys jaǵdaiyn surady. Osynda turyp jatqan stýdentter jastarǵa degen qamqorlyǵy úshin el aǵalaryna rizashylyǵyn bildirdi.
