Almaty oblysynda qazirgi tańda 1 380-nen astam dene shynyqtyrý ujymdarynda ulttyq sportpen ainalysýshylar sany 47 myń adamǵa jýyqtaidy. Onyń ishinde qazaq kúresine, toǵyzqumalaq pen jáne ulttyq at sportyna qyzyǵyshýlar qatary kóp, dep habarlaidy QazAqparat.
Ulttyq sport túrlerimen barlyǵy 562 jattyqtyrýshy (486 aýylda) oqý-jattyǵý jumystaryn júrgizedi. Jalpy, oblysta ulttyq sport túrlerin damytýǵa biýdjetten 69,9 mln teńge bólingen bolatyn. Búgingi tańda Almaty oblysy ulttyq sport túrlerin damytý boiynsha respýblika deńgeiinde úzdik úshtik qatarynda.
Oblysta 2011 jyly ulttyq sport túrlerinen klýb ashyldy. Onda kókpar, aýdaryspaq, teńge ilý túrlerinen 50-ge jýyq sportshy ainalysady.
Sondai-aq, oblysta zaman talabyna sai «Taldyqorǵan», «Kókbastaý», «Nurdáýlet», «Azem» syndy 4 ippodrom jumys isteidi. Ulttyq sport túrlerinen biylǵy jetistikter de az emes. Máselen, kókpardan Qazaqstan chempionatynda - 3-oryn; qazaq kúresinen 4-shi respýblikalyq ardagerler spartakiadasynda - 2 oryn; Astana qalasynda ótken Qazaqstan halqy Assambleiasynyń 20 jyldyǵyna arnalǵan respýblikalyq spartakiadada, toǵyzqumalaqtan respýblikalyq 4-shi Jazǵy ardagerler spartakiadasynda, qusbegilikten Úrjarda (ShQO) ótken Qazaqstan chempionatynda, jekpe-jekten Taldyqorǵanda ótken Qazaqstan chempionatynda jastar jáne eresekter arasynda tek 1-shi oryndarǵa qol jetkizilgen.
Bul jóninde Almaty oblysynyń óńirlik kommýnikatsiialar qyzmeti uiymdastyrǵan brifingte Almaty oblysy dene shynyqtyrý jáne sport basqarmasy ulttyq jáne buqaralyq sport túrlerin damytý bóliminiń basshysy Almat Úshkempirov aitty.
Sondai-aq, brifingtiń eń jas spikeri - biylǵy «Altyn tulpar» atty 3-shi respýblikalyq týrnirde Jannur atty sáigúligimen birge 51 shaqyrymdyq qashyqtyqty birinshi bolyp baǵyndyryp, respýblika boiynsha «Úzdik shabandoz» ataǵyn ielengen 13 jastaǵy Ashat Álimjan da oilarymen bólisti. Onyń keleshekte atbegi bolam degen bekem maqsaty bar eken.
