Almaty menshigine 383,5 gektar jer qaitaryldy. Bul týraly qala ákimi Baqytjan Saǵyntaev megapolis turǵyndarymen esep berý kezdesýi kezinde málimdedi, dep habarlaidy QazAqparat.
«Men taǵaiyndalǵan kezden bastap, megapoliste joldar, mektepter, aýrýhanalar, balabaqshalar, emhanalar, saiabaqtar, alańdar, qoǵamdyq demalys oryndaryn salý úshin bos jer jetispeidi degen problemaǵa tap boldym. Sondyqtan men ortalyqqa problemalyq nesieler qoryna kepilge berilgen jerdi qalaǵa berý týraly máseleni qoidym», - dep túsindirdi qala ákimi B.Saǵyntaev.
Sonymen, 2019 jyldyń 28 jeltoqsanynda QR Úkimeti «Problemalyq nesie qory» AQ men «Kazkom Reality» JShS jerlerin Almaty qalasynyń kommýnaldyq menshigine berý týraly sheshim qabyldady. Berilgen jerdiń jalpy kólemi 383,5 ga qurady.
«Bul jer ýchaskeleri qala úshin mańyzdy áleýmettik jobalardy júzege asyrý úshin paidalanylady», - dep atap ótti B. Saǵyntaev.
Demalys oryndary men saiabaqtarǵa 166,34 gektar jer bólindi, onyń 116,74 gektary Ile Alataýynyń bókterine túsedi.
Almaty shetindegi aýdandardy ortalyqtandyrý úshin áleýmettik nysandar boi kóteredi. Atap aitqanda 7 balabaqsha, 4 mektep, oqýshylar saraiy, emhana, metro, avtovokzal. Oǵan 87,44 ga jer qarastyryldy.
Jalpy, 2019 jyldyń qorytyndysyna sáikes, jer máselesi boiynsha 6693 oń sheshim qabyldandy, bul 2018 jylmen salystyrǵanda 2 ese kóp. Seifýllin men Jansúgirov qiylysyndaǵy jolaiyryqtyń qurylysyn jalǵastyrý úshin 117 úige ótemaqy tólendi.
