Qazaqstannyń eki qalasynda kezekten tys prezident sailaýy kezinde zańsyz sherýge shyqqan 500-ge jýyq adam ustaldy. Bul týraly ishki ister ministriniń birinshi orynbasary Marat Qojaev málimdedi, dep habarlaidy "Ult aqparat".
Aitýynsha, elordada "Jastar saraiy" aýdanynda bir top azamat Respýblika dańǵyly boiynsha jol qozǵalysyn jappaq bolǵan. Arandatýshylar men belsendi qatysýshylardyń áreketterine jaqyn ýaqytta zańdy baǵa beriledi, dedi ol.
"Politseilerdiń áreketine qatysty aitar bolsaq, barlyq is-shara zańǵa sáikes júrgizildi. Quqyq buzýshylardy ustaý kezinde arnaiy quraldar qoldanylǵan joq", - dedi ol.
Ol zańsyz aktsiialar kezinde 12 adamnyń meditsinalyq kómekke júgingenin atap ótti. Olar negizinen qan qysymynyń joǵarylaýyna shaǵymdanǵan.
"Áleýmettik jelilerde politseiler tarapynan zardap shekkender týraly, tipti adam ólimi jaily aqparat tarap jatyr. Bular shyndyqqa janaspaidy. Almaty qalasy densaýlyq saqtaý basqarmasynyń málimetinshe, meditsinalyq kómekke birde-bir adam júginbegen.
Nur-Sultan qalasynda zańsyz aktsiiaǵa qatysqandar tas, qolyna túsken zattardy laqtyryp, jas aǵyzatyn ballondar qoldanǵan. Osy áreket saldarynan úsh politsei jaraqat aldy. Ekeýi adamdardyń tas laqtyrýynan zardap shekse, bireýiniń kóziniń ainalasyn kúiik shalǵan", - dedi ol.
Qojaevtyń aqparatynsha, sailaý naýqanyn ótkizý kezinde tikelei daýys berý oryndarynda, kósheler men qoǵamdyq oryndarda qoǵamdyq tártipti qadaǵalaýǵa shamamen 19 myń politsiia qyzmetkeri tartylǵan. Hattamalar men biýlletenderdi odan ári oblystyq jáne ortalyq sailaý komissiialaryna jetkizý kezinde olardyń saqtalýy qamtamasyz etiledi.
"Jalpy daýys berý birqalypty jáne tynysh ótti. Barlyq 9 903 daýys berý bólimshesinde birde bir oqys oqiǵa tirkelgen joq, qoǵamdyq tártip saqtaldy", - dep túiindedi sózin ministrdiń birinshi orynbasary.
