Foto: Ashyq derekkóz
Almaty oblysynda bolǵan aýyr jol-kólik apaty adam ólimimen aiaqtaldy. Qaiǵyly oqiǵa 6 qańtar kúni tirkelgen, dep habarlaidy Ult.kz.
Úndistannyń Qazaqstandaǵy elshiliginiń málimetinshe, jol apatyna ushyraǵandar Shymkenttegi Ońtústik Qazaqstan meditsina ýniversitetinde bilim alyp júrgen tórt úndistandyq stýdent pen Úndistannan kelgen bir týrist. Olar Shymkentten Almatyǵa baǵyt alǵan.
Apat saldarynan eki stýdent oqiǵa ornynda qaza tapty. Taǵy úsh azamat aýyr jaraqat alyp, jansaqtaý bóliminde em qabyldap jatyr.
Elshilik habarlamasynda marqumdar Radjasthan shtatynyń turǵyndary Karan Parmar men Rishiradj Baraittyń otbasylaryna kóńil aityldy. Sondai-aq jaraqat alǵan Manjit Singh Solanki, Rahýl Iadav jáne Gýdjarat shtatynyń turǵyny, týrist Bridjeshkýmar Bharatkýmar Bhatige tezirek saýyǵyp ketý tilegi bildirildi.
Qazirgi ýaqytta Úndistannyń Astanadaǵy elshiligi qaza tapqandar men zardap shekkenderdiń otbasylarymen bailanys ornatyp, Qazaqstannyń jergilikti bilik ókilderimen birlesip, barlyq qajetti konsýldyq kómekti kórsetip otyr.
