29 sáýir kúni Almatydan qala syrtyndaǵy saiajailarǵa barý úshin blokposttardan 1021 avtokólik jáne 2093 adam ótti. Bul týraly qalalyq Politsiia departamentinen málim etti, dep habarlaidy QazAqparat.
«Blokposttarda jumys isteitin qyzmetkerler árbir adamdy jeke-jeke tekserip ótkizdi. Týyndaǵan máselelerdi sol jerde sheship berýge tyrystyq. Qart adamdarǵa aýyr sómkeleri men kóshet salynǵan qoraptaryn tasymaldaýǵa kómektestik. Volonterlerdi jumyldyrdyq. Azamattardyń basym bóligi Pervomai, Esik, Qaskeleń, Ile baǵytyndaǵy blokposttardan ótti», – dedi PD basshysynyń birinshi orynbasary Nurlan Almasbekov.
Buǵan deiin saiajaiǵa shyqqan almatylyqtar kólik keptelisine tap bolǵanyn jazǵan bolatynbyz.
Eske salaiyq, Almatyda karantin rejimi jeńildetilip, turǵyndarǵa balalarymen aýlada oinaýǵa jáne qala syrtyndaǵy saiajailarǵa barýǵa ruqsat etildi.
Osy rette, qala ákiminiń birinishi orynbasary Erlan Qojaǵapanov almatylyqtardy sanitarlyq talaptardy saqtaýǵa shaqyrdy.
«Eń aldymen, saiajaiǵa baratyn adamnyń qolynda menshigin rastaityn zańdy qujaty bolýy kerek. Budan bólek, ózin qosqanda úsh adam ǵana barýǵa rqósat. Mindetti túrde meditsinalyq maska taǵyp, qolynda antiseptik bolýy shart. Sondai-aq, asa qajettilik bolmasa saiajai aýmaǵynan shyǵýǵa bolmaidy. Qonaq shaqyrýǵa tyiym salynady»,– dedi Erlan Qojaǵapanov.
