Almaty mańyndaǵy Baiserke aýylynda ornalasqan demalys ornynda 2020 jyldyń kúzinde bolǵan atys isi boiynsha sot bastaldy, - dep habarlaidy Tengrinews.kz.
Is boiynsha sot talqylaýy Almaty oblysynyń Ile aýdandyq sotynda ótip jatyr. Oqiǵanyń sebepteri men mán-jaiyn anyqtap, tóreligin shyǵaratyn sýdia - Erken Seiitov.
Aiyptalýshylar tarapynda Abzal Qalenov, Erik Baqtybaev, Nikita Ohotskii, Azamat Rasýlov, Jarqyn Japelov jáne Oljas Baiturǵanov bar. Bári oqiǵanyń mán-jaiyn tergeý sátinen bastap qamaýǵa alynǵan. Olarǵa QR QK-nyń 293-baby 3-bóliginiń 2-tarmaǵynda kózdelgen qylmysty jasady degen aiyp taǵylyp otyr.
"Bul - buzaqylyq, iaǵni qoǵamdyq tártipti buzý, azamattarǵa zorlyq-zombylyq kórsetý, sondai-aq bótenniń múlkin joiý nemese búldirý, ádepsiz áreketter jasaý qarý-jaraq, pyshaq, jezden jáne basqa densaýlyqqa ziian keltirýge beiimdelgen zattardy qoldaný arqyly adamdar toby jasaǵan áreket", - delingen bap sipattamasynda.
Sottalýshylarǵa úsh jyldan jeti jylǵa deiin bas bostandyǵynan shekteý nemese aiyrý túrindegi jaza kózdelgen.
Eske salaiyq, 2020 jylǵy 31 qazanda Almaty mańyndaǵy Baiserke aýylynda ornalasqan demalys ornynyń iesi men qyzmetkerleri oq jaraqatyn alǵany habarlanǵan bolatyn. Politsiiadaǵylardyń aitýynsha, maska taqqan 15-20 adam demalys ornyna kelip, sol jerde mekeme iesimen - 1980 jyly týǵan er adammen janjaldasyp qalǵan. Sodan soń olar oq atqan. Artynsha oqiǵa ornynan sur tústi Mercedes w140 jáne aq tústi Mercedes kóligimen qashyp ketken. Negizgi kúdiktiler Almaty qalasy, Almaty, Qostanai oblystarynda ustalyp, qamaýǵa alynǵan.
