Foto: pexels.com
Májilis otyrysynda Tótenshe jaǵdai ministri Shyńǵys Árinov Almaty mańynda jer silkinisi kezinde adamdar panalaityn shatyrly lager qurý týraly josparyn aitty, depi habarlaidy «Ult aqparat» Stan.kz-ke silteme jasap.
Shyńǵys Árinov ministrliktiń jedel maqsattaǵy “Alataý”ońtústik bazasynyń qurylǵanyn aitty.
“Joiqyn jer silkinisi bolǵan jaǵdaida Almaty mańynda zardap shekkender úshin shatyrly lager qurylady. Sondai-aq gýmanitarlyq kómekti qabyldaý pýnkteri men basqa da qajet qosalqy nysandar bolady”, – deidi ministrlik basshysy.
Ministr lagerdiń basty artyqshylyǵy 173 gektar ashyq jer deidi.
“Bul jer opyryrylmaidy jáne ol jaryqtary joq ústirtte ornalasqan. Onda kiretin joldar bar jáne jaqyn jerde temir jol ornalasqan. Biz sonda trening ótkizemiz. Ol jaqta shatyrlar jetkilikti. Oǵan qosa, memlekettik materialdyq rezerv júiesiniń nomenklatýrasynda biz mindetti túrde shatyrlar, tósek-oryndar, arqaǵa asatyn sómkeler beremiz. Munyń bári qandai da bir derbestik bolýy úshin kerek. Taǵy bir sheshilmegen másele bar. Biz ár zardap sheqqan adamǵa termikalyq ishkiim men jyly kiim jáne barlyq qorǵanys quraldarynyń berilýin qamtamasyz etýge kóshemiz. Ár 10 adamda meditsinalyq qobdisha bolady. Sondai-aq alǵashqy meditsinalyq kómek kórsete alatyn dárigerler de bolady dep úmittenemiz. Sonymen qatar onda shatyrlar, uiyqtaýǵa arnalǵan qaptar, qural-jabdyqtar jáne úsh kúnge jetetin azyq-túlik bolady”, – deidi Shyńǵys Árinov.
Ministr adamdar jii-jii ornalassa, bazada 50 myń adam syiatyn oryn baryn aitady.
“Adamdardyń syiymdylyǵyn 1 million orynǵa jetkizsek deimiz. Tek Almaty mańynda ǵana emes, basqa qalalardyń janynan da osynjai qaýipsiz jer izdep jatyrmyz”, – dedi vedomstvo basshysy.
Eske salaiyq, buǵan deiin 23 qańtarda Almatyda jer silkinisi boldy. Astana ýaqytymen 00 saǵat 09 min 02 sekýndta almatylyqtar qatty jer silkinisin sezdi. Tótenshe jaǵdailar departamentiniń málimetinshe, jer asty dúmpýiniń epitsentri Almatynyń ońtústik-shyǵysynda, 264 shaqyrym jerde tirkeldi. Magnitýdasy – 6,7 ball. Budan soń turǵyndar qalada taǵy da birneshe jer silkinisi sezilgenin habarlady. Al TJD deregine sáikes aldaǵy ýaqytta qýatty jer silkinisi bolmaidy, sondyqtan dúrligýdiń qajeti joq.
