Almaty qalasy sanitariialyq-epidemiologiialyq baqylaý departamentiniń bastyǵy Jandarbek Bekshin qalalyq Qoǵamdyq keńesiniń otyrysynda sapasyz jeke qorǵanys quraldaryn satyp alý oqiǵasyna qatysty pikir bildirdi, dep habarlaidy QazAqparat.
«Jeke qorǵanys quraldary ótken jyly satyp alynǵan. Men bul máseleni birden kóterdim. Qyrkúiek aiynda sapasyz meditsinalyq kostiýmder anyqtalǵanan keiin men Sybailas jemqorlyqqa qarsy is-qimyl departamentine júgindim. Keiin isti sot qarady, biraq ózderińiz kórip otyrǵandaryńyzdai, bul jerde kóp nárse eskerilmegen. Men keshe ǵana eshqandai zerthanalyq zertteýler júrgizbei-aq olardyń qanshalyqty tiimsiz ekenin anyq, aiqyn, beineli túrde kórsettim. Iá, bul kir men shańnan qorǵaýǵa arnalǵan jeke qorǵanys quraldary, biraq virýstan emes», - dedi Almaty qalalyq sanitarlyq-epidemiologiialyq baqylaý departamentiniń bastyǵy Jandarbek Bekshin.
Eske salaiyq, keshe Sybailas jemqorlyqqa qarsy qyzmet janyndaǵy arnaiy monitoringtik top Almatynyń bas sanitar dárigeri Jandarbek Bekshinniń ótinishi boiynsha qoimada bir jylǵa jýyq saqtalǵan jeke qorǵanys quraldaryn tekserdi.
Qoimada túsirilgen videony Facebook-te Sybailas jemqorlyqqa qarsy qyzmet janyndaǵy arnaiy monitoring toby tóraǵasynyń orynbasary Rafael Gasanov jariialady.
Tekserý barysynda, qoimadaǵa taýarlar 2020 jyldyń maýsym aiynda respýblikalyq biýdjetten bólingen aqshaǵa satyp alynǵany anyqtaldy. 90 mln teńgege 12 myńǵa jýyq kostiým ákelingen. Bir jiyntyq 7500 teńge turady. Qazir qoimada 7028 danasy bar.
Búgin Almaty qalasy sanitariialyq-epidemiologiialyq baqylaý departamenti basshysynyń orynbasary Ásel Qalyqova «sapasyz» qorǵanysh quraldaryna qatysty pikir bildirdi.
Onyń aitýynsha, jeke qorǵanysh quraldaryn Qazaqstan Respýblikasynyń qoldanystaǵy memlekettik satyp alý zańnamasy sheńberinde júzege asyrylǵan.
