«QazAvtoJol» kompaniiasy «Almaty-Qorǵas» aqyly joly kúnine qansha qarajat túsetini jáne onyń qaida jumsalatynyn jariialady, dep habarlaidy "Ult aqparat" IIDM baspasóz qyzmetine silteme jasap.
Kompaniianyń málimetinshe, Almaty oblysynda aqyly eki jol ýchaskesi bar. Olar «Almaty-Shelek-Qorǵas» jáne «Almaty-Qapshaǵai-Taldyqorǵan» joly. Bul joldar júk kólikteriniń júktemesine tótep berý úshin betonnan jasalǵan.
«QazAvtoJol» JShS-nyń «Almaty-Qorǵas» aqyly jol bóliginiń basshysy Marat Syrymbai bul baǵytta júretin kólikten kúnine 1 mln 400 myń teńgege jýyq qarajat túsetinin aitady.
«Almaty-Qorǵas» aqyly tas joly 2018 jyly paidalanýǵa berilgen. 295 shaqyrymdy tas jol birinshi dárejeli 1B jolyna jatady. Kúnine 400 myńnan astam kólik júredi. Aqyly joldyń tarifi 1-25 teńge aralyǵynda. Jeńil kólikter 1 shaqyrymǵa 1 teńge tólese, júk kólikterine baǵa basqasha. Aqyly joldyń osy aýmaǵynan kúnine 1 mln 400 myń teńge qarajat túsedi», - deidi ol.
Marat Syrymbai joldyń búlingen bóligin lezde jóndep, qysta qardan tazartyp, taiǵaq jerge qum sebiletinin aitady.
«Kólikten túsken qarajat joldy jóndeýge, ony qalypty jaǵdaida ustap turýǵa jumsalady. Biyl 1200 sharshy metr aýmaqqa ortasha jóndeý jumysy jasaldy. 317 sharshy metr aýmaqta joldyń jaryǵy biteldi. Sondai-aq 616 sharshy metr aýmaqty quraityn asfalt betonyna jóndeý jumysy júrip jatyr. Jaqynda kúnniń qatty ysýynan tórt jerde beton kóterilip ketti. Ony sol kúni qaita jóndedik. Bul jol Qytaiǵa aparatyndyqtan, ásirese júk kólikteri paidalanady. Alaida pandemiia bastalǵaly kólik aǵyny azaidy. Betonnan jasalǵan jol aýyr júkke shydamdy», - deidi joldyń basshysy.
