Almaty qalasynyń ákimi bolyp Erbolat Dosaev taǵaiyndaldy, dep habarlaidy "Ult aqparat" Aqordanyń resmi saityna silteme jasap.
"Erbolat Asqarbekuly Dosaev Almaty qalasynyń ákimi bolyp taǵaiyndaldy", - delingen habarlamada.
Buǵan deiin bul qyzmetti Baqytjan Saǵyntaev atqardy. Ol 2019 jyldyń maýsymynda qala ákimi qyzmetine kirisken.
Aita keteri, buǵan deiin Prezident Qasym-Jomart Toqaev Baqytjan Saǵyntaevty qala ákimi qyzmetinen bosatý týraly turǵyndardyń petitsiiasyna qatysty pikir bildirdi.
Prezident Saǵyntaev megapoliste bolǵan tártipsizdikke bailanysty qiyn jaǵdaiǵa tap bolǵanyn aitty.
"Ony kinálai almaimyn. Qyzmettik mindetterin atqarý jaǵynan adal adam. Alaida almatylyqtardyń kóńil-kúiin de eskerýge mindettimin. Sol sebepti ýaqyt kelgende bilesizder", - dedi Toqaev.
Sodan keiin Baqytjan Saǵyntaev Armanjan Baitasovqa bergen suhbatynda qala turǵyndarynyń synyna jaýap berdi.
"Syn aitylatynyn bildim. Árine, bári aiaqtalǵan kezde syn da aityldy, petitsiia da paida boldy. Men de adammyn, ári qarai jumys isteýim kerek, men óz jumysymdy jalǵastyrdym, óitkeni qalany tez qalpyna keltirip, zalaldy óteý qajet. Qalai bolǵanda da, ár synnyń paidasy bar. Renjidim be, joq pa, men qyzmetimdi atqardym. Jaýapkershilikti túsinip, qala tirshiligin qamtamasyz etý kerek ekenimdi bildim", – dedi Saǵyntaev bergen suhbatynda.
Erbolat Asqarbekuly Dosaev 1970 jyly 21 mamyrda Almaty qalasynda dúniege kelgen. Almaty energetika institýtyn, Baýman atyndaǵy Máskeý memlekettik tehnikalyq ýniversitetin bitirgen.
Eńbek jolyn "TuranÁlem Banki" JAQ basqarma tóraǵasynyń orynbasary qyzmetinen bastady.
28 jasynda Dasaev Qazaqstan premer-ministriniń keńesshisi boldy.
1998 jyly Qazaqstannyń energetika, indýstriia jáne saýda vitse-ministri bolyp taǵaiyndaldy.
2000 jyly Qazaqstannyń qarjy vitse-ministri laýazymyna taǵaiyndaldy.
2001 jyly – Qazaqstan damý banki direktorlar keńesiniń tóraǵasy.
2001-2003 jyldary – Qazaqstan tabiǵi monopoliialardy retteý, básekelestikti qorǵaý jáne shaǵyn biznesti qoldaý jónindegi agenttiginiń tóraǵasy.
2003 jyldan 2004 jylǵa deiin Qazaqstannyń qarjy ministri, Qazaqstandaǵy Eýropalyq qaita qurý jáne damý bankiniń basqarýshysy bolyp jumys istedi. Osy kezeńde QR Ulttyq banki basqarmasynyń múshesi qyzmetin atqardy.
2004-2006 jyldar aralyǵynda Qazaqstannyń densaýlyq saqtaý ministri boldy.
2006 jyldan 2012 jylǵa deiin – Qazaqstannyń ekonomikalyq damý jáne saýda ministri.
2013 jyldan 2014 jylǵa deiin – Qazaqstannyń ekonomika jáne biýdjettik josparlaý ministri.
2014 jyldan – Qazaqstannyń ulttyq ekonomika ministri.
2015 jyly Qazaqstan Respýblikasynyń ulttyq ekonomika ministri bolyp qaita taǵaiyndaldy.
2016 jyly "Báiterek" ulttyq holdinginiń basshysy boldy.
2017 jyly QR premer-ministriniń orynbasary boldy.
2017 jyldyń qazanynda Qazaqstan ulttyq banki basqarmasynyń quramyna kirdi. "Damý" kásipkerlikti damytý qory direktorlar keńesiniń basqarma tóraǵasy boldy.
2019 jyly Qazaqstan Respýblikasy ulttyq bankiniń tóraǵasy bolyp taǵaiyndaldy.
