Almaty qalasy ákiminiń orynbasary Abzal Núkenov ál-Farabi atyndaǵy Qazaq ulttyq ýniversitetinde baryp, JOO-nyń qazirgi ǵylymi ázirlemelerimen, infraqurylymymen jáne innovatsiialyq múmkindikterimen tanysty.
Qala ákiminiń orynbasary joǵary tehnologiialyq jobalar men innovatsiialyq ázirlemeler usynatyn Farabi Hub innovatsiialyq ortalyǵynda boldy. Búginde hab iri investitsiialyq kompaniialarmen, ǵylymi-zertteý institýttarymen jáne jetekshi sheteldik ýniversitettermen tyǵyz áriptestik ornatqan. Zamanaýi qurylǵylarmen jabdyqtalǵan zerthanalarda túrli baǵyt boiynsha ǵylymi zertteýler júrgizilip, jańa tehnologiialar ázirlenip jatyr. Ortalyqtyń negizgi maqsaty – QazUÝ ǵalymdarynyń ǵylymi ideialary men jobalaryn ekonomikaǵa engizýdi jedeldetý jáne innovatsiialardy kommertsiialandyrý úderisin kúsheitý.
Budan keiin Abzal Núkenov Óndiristik robototehnika jáne injenerlik quzyretter ortalyǵynda boldy. Munda nemistiń joǵary sapaly KUKA robottary ornatylǵan. QazUÝ robototehnikany júieli damytyp, bul salada elimizdegi jetekshi ǵylymi ortalyqtardyń birine ainalyp keledi. Ýniversitet mamandary ziiatkerlik júieler, ushqyshsyz ushý apparattary jáne avtomattandyrylǵan óndiristik sheshimder baǵytynda zertteý júrgizip otyr.
Ákimniń orynbasary halyqaralyq deńgeide jumys isteitin «Tsifrlyq tehnologiialar jáne robototehnika» institýtynyń jáne Robototehnika ortalyǵynyń qyzmetimen de tanysty. 600 sharshy metr aýmaqta zamanaýi óndiristik tehnologiialar men jasandy intellekt negizinde qurylǵan bes innovatsiialyq platforma jumys isteidi. Munda stýdentter tsifrlyq óndiris úderisterin, kúrdeli avtomattandyrylǵan júielerdi meńgerip, ozyq tehnologiialar salasynda tájiribelik daǵdylardy meńgeredi.
JOO-nyn aralaǵan Núkenov ýniversitet bazasynda ornatylǵan sýperkompiýterdiń jumysymen tanysty. Ortalyq Aziiadaǵy eń qýatty esepteý júieleriniń biri sanalatyn bul sýperkompiýter elimizdiń ǵylymi infraqurylymyn kúsheitip, IT jáne jasandy intellekt salasyndaǵy mamandardy daiarlaýǵa jańa múmkindikter ashady. Onyń esepteý qýaty 2000 teraflops, al arhitektýrasy 400-den astam Intel Xeon 6330N serverlik protsessorlarynan turady.
Sonymen qatar, Abzal Núkenov geografiia jáne tabiǵatty paidalaný fakýltetine baryp, QazUÝ ǵalymdarynyń tabiǵatty qorǵaý, topyraq qunarlylyǵyn arttyrý, qurǵaqshylyqtyń aldyn alý jáne sý sapasyn jaqsartýǵa baǵyttalǵan ǵylymi jobalarymen tanysty.
Qala ákiminiń orynbasary ýniversitettiń tehnikalyq bazasynyń joǵary deńgeiin atap, Almaty jastaryna sapaly bilim berýde zamanaýi ǵylymi orta qalyptastyrýdyń mańyzdylyǵyna toqtaldy. Ol ýniversitet ujymyna ǵylymi jáne innovatsiialyq jobalardy júzege asyrýda tabys tilep, qala ákimdigi bilim, ǵylym jáne bilikti maman daiarlaý baǵytyndaǵy yntymaqtastyqty ári qarai nyǵaitýǵa múddeli ekenin jetkizdi.
