Almatydaǵy №68 mektep-gimnaziiasynda oqý jylynyń basynda birneshe muǵalimmen eńbek sharty toqtatylǵan. Buǵan ata-analar narazylyq bildirip, mektep ákimshiliginen túsinikteme berýdi talap etti, dep habarlaidy ult.kz Zakon.kz aqparat saityna silteme jasap.
Redaktsiiaǵa Orbita-2 shaǵynaýdanynda ornalasqan mektep-gimnaziia oqýshylarynyń ata-analarynan ujymdyq ótinish túsken. Olardyń málimetinshe, mektepte keminde 12 muǵalim jumystan ketken. Ata-analar arasynda tájiribeli ári oqýshylardyń qurmetine ie bolǵan ustazdar da bar ekenin aitqan.
Olardy ásirese muǵalimderdiń oqý jyly bastalǵan tusta aýysqany alańdatqan.
«Muǵalimderdiń kútpegen jerden aýysýy oqý protsesiniń sabaqtastyǵyna áser etip, oqýshylarǵa qosymsha psihologiialyq salmaq túsiredi», – dep jazylǵan ata-analardyń ótinishinde.
Ata-analar naqty mysal retinde 3 «M» synybynyń bastaýysh synyp muǵalimi Semenova N.-ny keltirgen. Ol balalarǵa birinshi synyptan beri sabaq berip kelgen. 31 tamyzda ata-analar jinalysyn ótkizgen, 1 qyrkúiekte sabaqqa kirisken. Al 3 qyrkúiekte ata-analarǵa muǵalimmen eńbek qatynastarynyń zeinet jasyna jetýine bailanysty toqtatylǵany habarlanǵan.
Alaida Almaty qalasynyń Bilim basqarmasy ata-analardyń málimetin naqtylap, mektepte 12 emes, toǵyz pedagogpen eńbek qatynastary toqtatylǵanyn málimdedi.
«Mektep ákimshiligi usynǵan aqparatqa sáikes, zeinet jasyna jetken toǵyz pedagogpen eńbek qatynastary jalǵastyrylmaǵan. Olardyń jasy 68 ben 78 jas aralyǵynda», – dep habarlady basqarma.
Vedomstvonyń málimetinshe, muǵalimderge eńbek qatynastarynyń toqtatylatyny aldyn ala jazbasha túrde habarlanǵan. Atap aitqanda, 68 jastaǵy Semenova N. 2026 jylǵy 26 mamyrda eskertilgen. Ol 58 jasynda zeinet jasyna jetkennen keiin de mektepte taǵy 10 jyl jumys istegen.
Osyǵan bailanysty Bilim basqarmasy kadrlyq ózgerister oqý jylynyń bastalýyna bailanysty kútpegen jerden qabyldanbaǵanyn atap ótti.
Sondai-aq basqarma 3 qyrkúiekte mektep direktory 3 «M» synybynyń ata-analarymen kezdesip, muǵalimniń eńbek shartyn toqtatý negizderi boiynsha túsinikteme bergenin habarlady.
Vedomstvonyń málimetinshe, qazirgi tańda mektepte oqý protsesin qamtamasyz etý úshin pedagogter tolyq jasaqtalǵan. 3 «M» synyby tiisti biliktiligi men tájiribesi bar jańa muǵalimmen oqýyn jalǵastyrady.
Sonymen qatar Bilim basqarmasy ata-analardyń, ásirese bastaýysh synyp oqýshylary úshin muǵalimniń aýysýyna alańdaitynyn túsinetinin jetkizdi.
Mektep basshylyǵyna ata-analar ókilderimen qosymsha túsindirý jumystaryn júrgizip, oqýshylardyń jańa synyp jetekshisine beiimdelýine jaǵdai jasaý usynylǵan.
