Almaty ákimi Baqytjan Saǵyntaev BAQ ókilderimen onlain kezdesý barysynda 20 sáýirden keiin jumysy qaita jandanatyn kásiporyndar týraly aitty, dep habarlaidy QazAqparat.
Qazir qalada PTR tásilimen barlyq qaýip tobyndaǵy adamdardy ekspress testileý bastaldy. Bul topqa 193 myń adam kiredi. Olar áskeri qyzmetshiler, politsiia, dárigerler, eriktiler, júk jáne jolaýshylar tasymaly kólikteri, temirjolshylar, qurylysshylar, iri nysanda jumys istep jatqan jumysshylar, internattar men azyq-túlik kásiporyndarynyń qyzmetkerleri, turǵyn-úi kommýnaldyq sharýashylyq salasynyń jumysshylary.
Astyrtyn oshaqtardy tabýdyń jańa algoritmine sáikes, qalada epidemiiaǵa qarsy sharalar qabyldanyp jatyr.
Ákimniń aitýynsha, kúsheitilgen karantin aiasynda qalada kóptegen kásiporyndar men uiymdar jumys istep jatyr. Bul kásiporyndarda 210 myń jumysshy qyzmet etedi.
Al karantin aiasynda 727,8 myń jumys orny qysqarǵany anyqtaldy. Qashyqtan jumys isteýge bilim berý, memlekettik basqarý, aqparat pen bailanys salasynda 200 myń adam shyqqan. Nátijesinde 300 myń adam tabyssyz qalǵan.
«Qalanyń áleýmettik-ekonomikalyq ahýalyn kezeń-kezeńimen qalpyna keltirý josparyna sáikes, ekonomikalyq belsendilikti jandandyrý úshin úlken áleýeti bar jáne sonymen qatar koronavirýstyq infektsiiany taratý qaýpi eń tómen sektorlar anyqtaldy. Bul - ónerkásip pen qurylys salalary. Osy salalar qajetti sanitarlyq-epidemiologiialyq talaptardy saqtai otyryp 20 sáýirden bastap iske qosylýy múmkin», - dedi qala ákimi Baqytjan Saǵyntaev.
Ónerkásip salasyndaǵy shekteýlerdi alyp tastaý nátijesinde 42,2 myń adam óz jumys oryndaryna oralady.
Qurylys maýsymynyń bastalýyna orai, sondai-aq «Jumyspen qamtýdyń jol kartasy» jáne jańa jobalardy iske asyrýǵa baǵyttalǵan «Nurly jer» baǵdarlamasy aiasynda 34,5 myń jańa jumys ornyn ashý, ásirese qurylys salasynda, josparda bar. Sonymen qatar, aýqymdy qurylys jumystarynyń bastalýymen jobalaýshylar men izdestirýshilerge, injiniringtik kompaniialar (avtorlyq jáne tehnikalyq qadaǵalaý), jobalardy saraptaý siiaqty mamandar men qyzmetter kategoriialaryna qajettilik paida bolady.
Budan ózge qurylys salasynyń úzdiksiz jumys isteýin qamtamasyz etý maqsatynda kóterme qurylys naryǵyn ashý qajet. Osylaisha, osy sala boiynsha jumyspen qamtylǵandardyń sany 45,3 myń adamǵa ulǵaiady.
Sondai-aq, «BJK-2025» jáne «Qarapaiym zattar ekonomikasy» baǵdarlamalaryn iske asyrýǵa qatysatyn kásipkerlerdiń kepil múlkin memlekettik tirkeý úshin notariýstar men HQKO qyzmetin qaita bastaý josparlanypotyr.
Aldyn ala derekter boiynsha, 20 sáýirden bastap jumyspen qamtylǵandardyń jalpy sany bir ai ishinde 89,4 myń adamǵa kóbeiedi.
Shekteýlerdi kezeń-kezeńmen alyp tastaý qoǵamdyq kólikterdi, sonyń ishinde aialdamalar men metro aialdamalaryn, kásiporyndardyń ózderiniń jumys oryndary men halyq kóp jinalatyn oryndardy jappai zalalsyzdandyrýmen qatar júredi.
