Almaty dárihanalarynda maska jetkilikti, kún saiyn monitoring júrgizilip otyrady. Bul týraly Almaty qalasy Taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaqasymova brifing barysynda aitty, - dep habarlaidy «Ult aqparat».
«Kelisim boiynsha óndirýshiler 70 dárihanaǵa jetkilikti deńgeide ári qoljetimdi baǵada maska jetkizip jatyr. Keshe bul dárihanalarda 144 myń maska bolsa, búgin 250 myńǵa jýyq. Kelisim boiynsha bir adamǵa on danadan artyq berilmeidi jáne úsh qabatty meditsinalyq maska – 87, filtri bary 111 teńgeden aspaýy kerek. Bul respýblika boiynsha eń tómengi baǵa. Qalada maska jetkilikti», - deidi Aizat Moldaqasymova.
Sondai-aq ol arnaiy organdarmen tárkilengen maskalar da meditsina mekemeleri men dárihanalarǵa jetkizilgenin aitty.
Aita keterligi, Almatyda 5 dárihana uiymynda dári quny zańsyz kóterilgen.
Almaty boiynsha TJ jaǵdaiynda áleýmettik mańyzy joǵary 103 dárilik zattyń ataýy tizimdelgen.
«Bul dárilerdiń baǵasyn kótermeý jaily qalalyq ákimdik pen Taýarlar men qyzmetterdiń sapasy men qaýipsizdigin baqylaý departamenti, Farmatsevtikalyq qyzmetti qoldaý men damytý qaýymdastyǵynyń arasynda memorandýmǵa qol qoiylǵan. Almaty ákimdigi men departament qyzmetkerleri qalanyń 8 aýdanynda kúndelikti baǵalarǵa monitoring júrgizedi», - dep atap ótti Departament basshysy.
Tekserý nátijesinde 135 dárihana uiymy ishinde 5 dárihanada dári baǵasyn negizsiz kóterilgeni anyqtaldy.
«5 dárihanada dári baǵasy negizsiz qymbattaǵan. Bul memorandým men birqatar zańnamany buzý bolyp tabylady. Dárihana uiymy basshysyna hattama toltyrylyp, ákimshilik sotqa joldandy. Olarǵa 97 myń men 235 myń teńge aralyǵynda aiyppul qarastyrylǵan», - dedi Aizat Moldaqasymova.
