Almatyda dárihanalarǵa dári jetkizilýiniń arqasynda kezek azaidy, dep habarlaidy QazAqparat.
Búgin BAQ ókilderi qaladaǵy iri dárihanalarǵa baryp, baqylaý júrgizgen bolatyn.
«Uzyn-sonar kezek osydan 1 apta buryn bolǵan. Qosymsha kassa terminaldary ashyldy. Qosymsha qyzmetkerler aldyq. Nátijesinde kezek máselesi tolyq sheshildi. COVID-19 emdeýge arnalǵan dáriler túgel bar. Antibakterialyq, antikogýlianttyq, qabynýǵa qarsy preparattar barlyǵy bar. Dárihanalar tolyq qamtylǵan. Kúnde jetkizilip jatyr»,- deidi «Aptekapliýs» dárihanasynyń bólim meńgerýshisi Ainur Almahambetova.
Buǵan deiin dárihanalarǵa kezekke turǵan adamdar 2 saǵattap tún ortasyna kútkenin jazǵan bolatynbyz.
«Búginde dári-dármek ýaqytynda kelip otyrady. Aptasyna 1-2 ret taýar alamyz. Adamdar tarapynan kóbinese aspirin, qyzý túsiretin dárilerge suranys kóp», - dedi basqa dárihana meńgerýshisi Gúlnar Medibek.
Shilde aiynan bastap ákimdik jedel jelini iske qosty. Bul bailanys telefondary arqyly turǵyndar dári dármektiń bar-joǵyn bile alady.
«14 shildeden bastap dárilik zattarǵa suranys azaia bastady. 14 shildede táýligine 1000 qońyraý tússe, qazir 250 adam ǵana habarlasady», - deidi «Qoldaý» ortalyǵynyń departament direktorynyń orynbasary Rýzana Taranýha.
Almaty ákimdigi dárimen qamtý boiynsha úilestirýshisi Zańǵar Sálimbaevtyń aitýynsha, ákimdik 29 maýsymda iri óndirýshilermen kelisimge kelgen.
Barlyǵy 105 dárihanamen yntymaqtastyq týraly memorandýmǵa qol qoiyldy.
Sonymen qatar, bir adamǵa 3 dáriden artyq satylmaidy. Bul alyp-satý áreketterdiń jolyn kesý úshin jasalǵan.
«10 shildede ár elden 6 mln jýyq medikament ákelindi. Qazir Úndistannan taǵy bir ushaq keledi. 30 tonna júkti ákimdik satyp aldy. Bul kúz ben qysqa qor jasaý úshin kerek bolyp jatyr. Naryqty retteý úshin ákimdik 5 mlrd teńge bólip, turaqtandyrý qoryn ashty. Odan bólek aýrýhanalardy dárimen qamtý úshin qosymsha 5 mlrd teńge bólindi», - dedi spiker.
