Foto: 365info.kz
Almaty qalasynyń ákimi Erbolat Dosaev Medeý aýdany turǵyndarymen kezdesýde 2025–2027 jyldarǵa arnalǵan aýanyń sapasyn jaqsartý josparyn qalai júzege asyratynyn aitty. Bul jospardyń bir bóligi qalaǵa kirýdi shekteýdi qamtidy, dep habarlaidy Ult.kz.
Megapolistegi aýanyń tazalyǵyn qamtamasyz etý úshin Almaty biligi turaqtar qunyn aitarlyqtai kóterýdi kózdep otyr. Al ekologiialyq standarttarǵa sai kelmeitin eski kólikter úshin qalaǵa kirý aqyly bolmaq.
«Jaz ailarynan bastap (shilde-tamyz) turaqtar qunyn edáýir kóteremiz. Muny barlyq iri qalalar jasaidy. Osylaisha, keibir kólikterdi yǵystyrýdy josparlap otyrmyz. Sondai-aq, qoǵamdyq keńes pen máslihattyń talqylaýyna tómen shyǵaryndyly aimaqtar (low-emission zones) qurý máselesin usynamyz», – dedi ákim.
Erbolat Dosaev shekteýlerdi engizý kólik qyzmetiniń sapasyn jaqsartqannan keiin ǵana múmkin bolatynyn málimdedi.
«Maǵan Niý-Iork týraly jii aitady, onda qozǵalys 20%-ǵa azaiǵan, sebebi tólem engizilgen. Biraq Niý-Iork bul qadamǵa uzaq jyldar boiy daiyndaldy. Biz kólik infraqurylymy shamamen 2026 jyldyń sońyna qarai jańǵyrtylsa, 2027 jyldan bastap alǵashqy tólem arqyly shekteýler engizemiz dep boljap otyrmyz. Iaǵni, eger kólik Almatyda tirkelgen, biraq qazirgi zamanǵy standarttarǵa sáikes kelmese, belgili bir aimaqtarǵa kirý aqyly bolady», – dep túsindirdi Dosaev.
Elektromobilder úshin kirý aqysyz bolyp qala bermek.
Erbolat Dosaev 2025 jyldyń kúzine qarai qalada intellektýaldy kólik júiesin engizý josparlanyp otyrǵanyn atap ótti. Bul júieniń esepteri negizinde jol qozǵalysy máselesin sheshý qarastyrylmaq.
