Almatyda qala ákiminiń orynbasary Erjan Babaqumarovtyń tóraǵalyq etýimen koronavirýstyq infektsiianyń taralýynyń aldyn alý jónindegi aimaqtyq shtabtyń otyrysy ótti, dep habarlaidy "Ult aqparat".
Jiynda Almatynyń qazirgi jaǵdaiy pysyqtalyp, álem boiynsha koronavirýs infektsiiasyn juqtyrýshylar sanynyń kúrt ósýi eskerile otyryp qabyldanatyn sanitarlyq-karantindik baqylaýdy kúsheitý týraly sharalar barysy sóz etildi.
1 naýryzynan bastap Qazaqstannyń bas sanitarlyq dárigeriniń Qazaqstandaǵy koronavirýs infektsiiasynyń aldyn alý sharalaryn odan ári kúsheitý týraly» qaýlysy kúshine endi. Osylaisha ózge elderdegi koronavirýstyń taralý deńgeiin eskerip, epidemiiaǵa qarsy is-sharalardy júrgizýdiń úsh jiktemesi anyqtaldy.
Birinshi sanatqa sáikes QHR, Iranda 14 kúnge meditsinalyq baqylaý arqyly arnaiy bólingen úi-jailarǵa oqshaýlanady. Ol jerden shyǵarylǵannan keiin 10 kúnniń ishinde bastapqy meditsinalyq-sanitarlyq kómek uiymdarynyń baqylaýynda bolmaq.
Al Gonkong, Makao, Taivan, Ońtústik Koreia, Japoniia, Italiiada kúndelikti meditsinalyq qyzmetkerdiń baqylaýynda ári 10 kún boiy úiinde karantinge jabylady.
2 sanat – Singapýr, Tailand, Ázerbaijanda – 14 kún boiy meditsina qyzmetkeriniń baqylaýynda bolyp, sodan keiin 10 kún qońyraý shalý arqyly qadaǵalaýǵa alynady.
3 sanat – Germaniia, AQSh, BAÁ, Ulybritaniia, Frantsiia, Bahrein, Kýveit, Ispaniia, Malaiziia – QR shekarasyn kesip ótken kúnnen bastap 24 kún boiy qońyraý shalý arqyly meditsina qyzmetkeriniń baqylaýyna alynady.
Búginde Almatydaǵy barlyq emhanalarda oqshaýlaǵysh, provizorlyq tósekter daiyn. Súzgilerdiń jumysy qalypty, respiratorlar men virýstan qorǵaityn basqa da quraldar sany jetkilikti. Koronavirýstyq infektsiiaǵa kúdikti adamdardy jedel tekserý júrgiziledi. Qosymsha tósek-oryndar uiymdastyrý boiynsha sharalar qabyldanýda.
«Qalanyń meditsinalyq uiymdary koronavirýstyq infektsiianyń taralýyna jol bermeý úshin óziniń fýnktsionaldyq mindetterin oryndaýǵa daiyn. Qalanyń meditsinalyq kadrlarymen daiyndyq jumystary júrgizildi. Meditsina qyzmetkerleri koronavirýstyq infektsiianyń taralýyna jol bermeý úshin is-sharalardy júzege asyrýǵa tolyq daiyn», – dedi Almaty qalasy Qoǵamdyq densaýlyq basqarmasynyń basshysy Tileýhan Ábildaev.
Megapolistegi barlyq kólik baǵyttary da baqylaýǵa alyndy. Halyqaralyq áýejai aýmaǵynda profilaktikalyq jáne epidemiiaǵa qarsy is-sharalardy ótkizýge erekshe kóńil bólinedi. Koronavirýstyq infektsiia jaǵdailary tirkelgen elderden kelgen barlyq adamdar epidemiologtardyń baqylaýyna alyndy.
Almatyǵa 6 aqpannan bastap 13 myńnan astam jolaýshy keldi. 35-ke jýyq epidemiolog qalaǵa kelgen barlyq reisterdi tekserdi.
«Kelgen adamdarǵa biz turaqty meditsinalyq baqylaý júrgizemiz», – dedi qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaǵasymova.
Almaty qalasynyń áýejaiynda qosymsha 1 sanattaǵy jolaýshylarǵa arnalǵan jańa tranzittik zal ashyldy.
Otyrys qorytyndysy boiynsha óńirlik shtab tóraǵasy E. Babaqumarov barlyq memlekettik mekemelerge, onyń ishinde mektepterge, joǵary oqý oryndaryna jalpyǵa ortaq paidalanýǵa qoljetimdi antiseptikalyq jáne dezinfektsiialyq quraldardyń bolýyna baqylaýdy kúsheitýdi tapsyrdy. Virýstardan qorǵaityn quraldar adamdar kóp shoǵyrlanatyn jerlerge de qoiylýy tiis. Tiisti usynym hattar saýda ortalyqtarynyń, HQKO jáne t.b. ákimshilikterine jiberildi.
Budan basqa turǵyndar arasynda da virýstyń aldyn alýyn qamtamasyz etý sharalary týraly aqparattyq-túsindirý jumystaryn kúsheitý kerektigi júkteldi.
