Kólik politsiiasy Almaty áýejaiynda qoǵamdyq tártipti qadaǵalaý boiynsha qosymsha sharalar qabyldady, dep habarlaidy QazAqparat.
Almaty qalasy áýejaiyndaǵy jelilik politsiia bóliminiń bastyǵy Talǵat Tálipovtyń aitýynsha, áýejaidaǵy kólik saqshylary kúsheitilgen rejimde jumys istep jatyr.
Politseiler qoǵamdyq tártip pen júkterdi saqtaýǵa, sondai-aq izdestirýde júrgen tulǵalardy anyqtaýǵa basa kóńil bólýde.
«Jeke qurammen jolaýshylarǵa barynsha kómek kórsetýge baǵyttalǵan tiisti nusqamalar júrgizilýde. Aviatsiialyq qaýipsizdik qyzmeti ókilderimen birlesip, metall izdeý qurylǵylary arqyly tekseris júrgizilip jatyr. Qazir terminalǵa kirýge tek ushatyn jolaýshylarǵa ruqsat berilgen. Jolaýshylar men olardyń júkteri tekseriledi», - dedi ol.
Osyǵan bailanysty ol jolaýshylardan politsiia qyzmetkerleriniń olardyń qujattaryn tekserý kezindegi áreketterine túsinistikpen qaraýyn suraidy.
«Tyiym salynǵan zattardy saqtaý, tasymaldaý áreketi ákimshilik jáne qylmystyq jaýapkershilikke ákep soqtyratynyn atap ótkim keledi», – dedi Talǵat Tálipov.
Budan basqa shetel azamattarynyń jáne azamattyǵy joq tulǵalardyń QR kóshi-qon zańnamasy talaptaryn saqtaýyna baqylaý kúsheitilgen.
«Qazirgi ýaqytta elimizdegi sanitarlyq-epidemiologiialyq jaǵdaidyń jaqsarmai, kerisinshe, kún saiyn SOVID-19 diagnozy rastalǵan tulǵalardyń sany artyp otyrǵanyn qaperge alamyz. Osyǵan qarai, azamattarǵa áýejailar men basqa da qoǵamdyq oryndarda qaýipsizdik sharalaryn saqtaýlaryn, jeke qorǵaný quraldaryn qoldanýlaryn suraimyz», – dep qosty ol.
