Azamattyq aviatsiia komiteti Almaty halyqaralyq áýejaiy 13 qańtardan bastap ashylatynyn habarlady, dep jazady Sputnik Qazaqstan.
Buǵan deiin BAQ-ta áýe ailaǵy 14 qańtarda ashylýy múmkin degen aqparat tarady. Alaida áýejaidyń baspasóz qyzmeti muny rastaǵan joq. Keiin ákimdik áýejai tótenshe jaǵdai rejimi aiaqtalǵanǵa deiin, boljammen 19 qańtarǵa deiin jabyq bolatynyn málimdedi. Biraq kóp uzamai muny joqqa shyǵardy.
Artynsha azamattyq aviatsiia komiteti Almaty halyqaralyq áýejaiy 13 qańtardan jumysyn jandandyratynyn habarlady.
"Áýejai basshylyǵynyń aldyn ala málimetinshe, áýe kompaniialarynyń ushý kestesine sáikes 08.00-den 21.00-ge deiin ishki jáne halyqaralyq reister oryndalady", - delingen habarlamada.
Eske salsaq, búkil Qazaqstanda 6 qańtardan tótenshe jaǵdai rejimi engizildi. Ol sársenbi, 19 qańtarǵa deiin sozylady.
