Foto: kaz.tengrinews.kz
Almaty halyqaralyq áýejaiy Májilis depýtaty Konstantin Avershinniń VIP terminaldy buzyp, kóshirýge qatysty depýtattyq saýalyna jaýap berdi, - dep habarlaidy Tengrinews.kz portaly.
Vedomstvonyń málimetinshe, VIP terminaldy jańa orynǵa kóshirý áýejaidyń mádeni murasynyń saqtalýyna yqpal etedi.
Sondai-aq, terminaldyń ornyn aýystyrý barlyq qajetti ruqsattarmen júzege asyrylatyny aitylady.
"Búkil jobany EBRD jáne IFC halyqaralyq qarjy institýttary qarjylandyrady, olar mádeni murany qorǵaýdyń eń joǵary álemdik standarttaryn talap etedi. 2020 jyldan bastap bul protsess Britandyq Mott MacDonald konsýltanttarynyń táýelsiz baqylaýymen barynsha ashyq júzege asyrylyp keledi. Múddeli taraptarmen turaqty kezdesýler ótkizildi, onyń ishinde bes qoǵamdyq tyńdaý men talqylaý boldy.
Almaty áýejaiyn halyqaralyq standarttarǵa sai damytý boiynsha júzege asyrylyp jatqan jobanyń ortalyq bóligi bolyp tabylatyn jańa ǵimaratta mádeni muralar saqtalady jáne keńeitiledi", - delingen habarlamada.
Bul rette jańa halyqaralyq jolaýshylar terminaly 2024 jyldyń jazynda ashylady dep josparlanyp otyr.
Aita keteiik, Almaty áýejaiynyń tarihi ǵimaraty 1947 jyly salynǵan jáne Almaty qalasynyń tarihi jáne mádeni eskertkishteriniń Memlekettik tizimine engizilgen.
"Sáýlet eskertkishin jyljytý degenimiz ony jańa oryndaǵy bar sándik elementtermen qaita jasaý", - dep tolyqtyrdy vedomstvo.
Habarlamada ǵimarattyń qaita jasalatyny jáne sándik elementterdiń bastapqy kórinisin saqtaityny aitylǵan.
"Barlyq sándik elementteri saqtalǵan terminal Almaty halyqaralyq áýejaiynyń aýmaǵynda 420 metr radiýsqa jyljytylady, sol arqyly ǵimaratty tarih jáne mádeniet eskertkishi retinde saqtaý úshin jaǵdai jaqsarady", - dep tolyqtyrdy vedomstvo.
