Almaty qalasy ákiminiń orynbasary Beibit Shahanov Tilendiev kóshesin uzartý úshin memleket muqtajyna satyp alynatyn jer telimderi men turǵyn úilerdiń ótemaqy kólemine qatysty másele kótergen Alataý aýdanynyń turǵyndarymen kezdesti.
Kezdesý barysynda ákimniń orynbasary qala basqarmalarynyń ókilderimen birge turǵyndardyń ótinish-saýaldaryn tyńdap, qoldanystaǵy zań normalaryna túsinikteme berdi.
«Qala qarqyndy damyp keledi. Mektep, emhana, sport jáne mádeniet ortalyǵy, sondai-aq kólik infraqurylymyn keńeitý, jańa metro beketterin salý, magistraldyq kóshelerdi uzartý sekildi infraqurylymdyq jobalardyń qajettiligi artyp otyr. Osy jobalardy júzege asyrý úshin burynnan qalyptasqan aýdandar men jeke qurylys basym aýmaqtardy qaita uiymdastyrý qajet. Sol sebepti jer telimderin satyp alýǵa májbúrmiz. Bul táýelsiz baǵalaý negizinde naryq quny boiynsha júrgiziledi, ákimdik baǵalaý nátijesine yqpal ete almaidy», – dedi Beibit Shahanov.
Kezdesýge kelgen Ójet shaǵynaýdanynyń turǵyndary múliktiń baǵalaý qunynmen kelispeitinin aitty. Sondai-aq, kópshiliginiń jer telimderi men qurylys nysandaryna qatysty quqyq belgileitin qujattary joq.
«Búginde shamamen 30 menshik iesinde jer men turǵyn úige qatysty qujat rásimdeýge bailanysty qiyndyqtar bar. Salaǵa jaýapty basqarmalar árbir jaǵdaidy jeke qarastyryp, qajetti túsindirý jumystaryn júrgizýi, al qajet bolǵan jaǵdaida qoldanystaǵy zańnama aiasynda múlikti zańdastyrýǵa járdem kórsetýge tiis», – dedi ákimniń orynbasary.
Kezdesý sońynda Beibit Shahanov Jer qatynastary basqarmasyna aýdan ákimdigimen birlesip turǵyndar arasynda turaqty túrde túsindirý jumystaryn júrgizýdi, sonymen qatar baǵalaý kompaniiasynyń ókilderimen kezdesý uiymdastyryp, múlikti baǵalaý talaptaryn keńinen túsindirýdi tapsyrdy.
Aita keteiik, Almatynyń 2040 jylǵa deiingi Bas jospary aiasynda kólik qatynasynyń qoljetimdiligin arttyrý jáne jol-kóshe jelisin jetildirý maqsatynda Tilendiev kóshesin Rysqulov dańǵylynan qala shekarasyna deiin uzartý qarastyrylǵan.
Tilendiev kóshesin uzartý jobasy eki kezeńge bólingen:
1. Birinshi kezeń – Rysqulov dańǵylynan Sabataev kóshesine deiin, uzyndyǵy 5,8 shaqyrym. Munda 123 jer telimin satyp alý kózdelgen.
2. Ekinshi kezeń – Sabataev kóshesinen qala shekarasyna deiin, uzyndyǵy 4,9 shaqyrym. Bul kezeńde 344 jer telimi satyp alynýǵa tiis.
Búginde 70 jer telimi satyp alyndy. Eske sala keteiik, memleket qajetine jer telimderi zańnamaǵa sáikes naryq quny boiynsha satyp alynady. Baǵalaý menshik quqyǵy qalai paida bolǵanyna, qujattyń tolyq bolýyna nemese bolmaýyna bailanysty emes, iaǵni baǵalaý barlyq jaǵdaida naryq qunyna negizdeledi.
