Almatyda Abai atyndaǵy qazaq memlekettik akademiialyq opera jáne balet teatrynda Qazaqstan Jazýshylar odaǵynyń jáne «Qazaq ádebieti» gazetiniń 85 jyldyq mereitoiyna orai ótken jiynda qala ákimi Baqytjan Saǵyntaev qalamger qaýymǵa qandai qoldaý kórsetiletinin aitty, dep habarlaidy "Ult aqparat".
«Jazýshylar odaǵynyń qatparly tarihy Almatymen tustasyp keledi. 85 jyl buryn boi kótergen odaqtyń birneshe býyny Almatyda qalyptasyp, osynda tabysty eńbek etti. Súiikti qalamyz týraly qalam terbemegen jazýshy, tolǵanbaǵan aqyn joq dese bolady. Qazir Almatyda Jazýshylar odaǵynyń 360 múshesi turady. Sol qalamgerlermen keń kólemde de, jeke de birneshe márte júzdesip pikir almastyq», - dedi shahar basshysy Baqytjan Saǵyntaev.
Ákimniń aitýynsha, qala ákimdigi belgili shyǵarmashylyq ókilderiniń keshterin, kórmelerin, mereitoilaryn uiymdastyryp keledi.
«Múmkindigine qarai kitaptardy da shyǵaryp jatyrmyz. Biyl ziialy qaýym ókilderimen jumys jasaýdyń jańa júiesin engizdik. Odaqtyń tikelei usynysy boiynsha 150 grant taǵaiyndaldy. 90 grant óz ielerine jetse, qalǵan 60 jyl sońyna deiin tabystalady. Aldaǵy jyldary iriktelgen 20-ǵa jýyq aqyn-jazýshynyń kitaptarynyń jaryq kórýine qoldaý kórsetemiz. Bul baǵyttaǵy jumystar óz kezeginde aqyn jazýshy, dramatýrg, synshylardyń qalamyzdyń, tutastai elimizdiń tynys tirshiligin sýretteitin ádebi shyǵarmalar jazýyna septigin tigizedi dep oilaimyz. El rýhaniiatynyń ortalyǵy sanalatyn qalamyzdyń órkeniet jolynda ózderińizben aianbai eńbek etip, mádenietimiz ben ádebietimizdi damytý barlyǵymyzdyń ortaq mindetimiz dep esepteimin», - dedi Baqytjan Saǵyntaev.
Al, «Egemen Qazaqstan» gazetiniń basqarma tóraǵasy Darhan Qydyráli bas gazettiń qazaq qalamgerleriniń shyǵarmashylyǵyn nasihattaýda qandai jumystar atqarylatynyn aitty.
«Egemen Qazaqstan» gazetiniń tirajy 200 myńnan asatynyn ózderińiz bilesizder. Qazaq ádebietiniń qazirgi jas ádebietshilerine qoldaý kórsetý úshin jas qalamgerlerdi, esimi elge belgili qalamgerlerdi shyǵarýǵa tyrysamyz. Osy maqsatta arnaiy Ádebiet, Rýhaniiat betin ashqanbyz. Rýhaniiat betinde mádenietimizdiń ár salasy teatr, kino, proza, poeziia, dramatýrgiia týraly maqala jariialanady. Qazaq ádebietiniń qalamgerleriniń jumysy shalǵaidaǵy keń oqyrmandarǵa jetý úshin osyndai jumystar atqarylyp jatyr. Jaqynda «Úmit», «Eń qysqa áńgime» degen baiqaý ótkizdik. Saitta turaqty túrde jas qalamgerlerdiń tyrnaqaldy týyndylaryn jariialap turamyz. Saiasi-ekonomikalyq basylym bolǵanmen qazaq ádebietiniń damýyna úles qosyp otyrmyz», - dedi Darhan Qydyráli.
Aita ketý kerek, búgin Almatyda Abai atyndaǵy qazaq memlekettik akademiialyq opera jáne balet teatrynda Qazaqstan Jazýshylar odaǵynyń jáne «Qazaq ádebieti» gazetiniń 85 jyldyq mereitoiyna orai pleným ótti.
