Almaty qalasynyń ákimi Baýyrjan Baibek qalanyń jol infraqurylymyn salý jáne qaita jasaý barysyn tekserdi, dep habarlaidy "Ult aqparat".
Baýyrjan Baibek Áýezov kóshesi boiymen Timiriazev kóshesinen Gogol kóshesine deiingi 3,6 shaqyrymdyq aýmaqty jóndeý jumystarynyń barysyn tekserdi. Bul ýchaskedegi jóndeý jumystary 12 tamyzda aiaqtalady dep josparlanǵan.
Biyl qalada 146 km jol jóndelip, 97 myń sharshy metr trotýar abattandyrylady. Sondai-aq, qalada BRT men Orbitadan Kókbazarǵa deiingi aýmaqty qamtityn 21 shaqyrymdyq velodáliz qurylysy júrip jatyr.
Avtomobil joldary basqarmasynyń aqparaty boiynsha Jeltoqsan kóshesiniń Timiriazev kóshesinen Tóle bi kóshesine deiingi 2,3 shaqyrymdyq bóligi sonymen qatar Tóle biden Raiymbek dańǵylyna deiingi 2,08 shaqyrymdyq bóliginde jóndeý jumystary aiaqtalyp qaldy.
Almatynyń ákimi Ótepov kóshesi boiymen Rozybaqiev kóshesinen Atakent kórmesine deiingi aýmaqty jóndeýdiń sapasyn da tekserdi. Atalǵan nysanda tramvai relsteri alynyp, asfaltbeton tóselgen, jańa velosiped aimaǵy paida bolǵan. Jolaýshylar kóligi jáne avtomobil joldary basqarmasynyń málimeti boiynsha bul ýchaskege on kún ishinde jol belgileri qoilatyn bolady.
Qala basshysy jumys sapary barysynda Toraiǵyrov jáne Kablýkov kóshelerinde júrip jatqan jóndeý jumystarymen tanysty. Almaty ákimi jol infraqurylymyn salý men qaita jasaýda jaiaý júrginshi aimaqtaryna jete nazar aýdarý qajettigin qadap aitty.
Aita keteiik, jyl aiaǵyna deiin 102 ótpeli jol qaita jasalyp, jaryqtandyrýmen qamtamasyz etiledi. Avtobýstar men trolleibýstar jolaqtary 100 kilometrge deiin uzarady. Aqyly kólik turaǵynyń sanyn 10 myń orynǵa jetkizý kózdelip otyr. Al, 1 700 velosipedi bar velobeketter sany 200-ge deiin jetetin bolady.
Sonymen qatar, Fýrmanov, Abai, Hmelnitskii kóshelerin úńgileý jáne birneshe jolairyqtaryn salý jumystary da jalǵasýda.
Jyl aiaǵyna deiin 500 aýlany jóndeý jáne qaita jasaý josparlanǵan.
Bulardan ózge jaiaý júrginshige basymdyq berý úshin qaita jańarǵan Panfilov, Jibek joly, Gogol, Qabanbai batyr kósheleri men «Astana» alańyna kespe tas tóseý, jasyl jelek otyrǵyzý, kishi arhitektýralyq formalardy ornatý, sport inventarlaryn, balalar alańdaryn jasaý, velojoldardy abattandyrý, ǵimarattardyń syrtqy kórinisin jańartý jumystary josparlanǵan.
