QR Prezidenti janyndaǵy Ortalyq kommýnikatsiialar kyzmetindegi baspasóz konferentsiiasynda Almaty qalasynyń ákimi óńirdiń áleýmettik-ekonomikalyq damýynyń 2019 jyldyń 10 aiynyń qorytyndysymen bólisti, – dep habarlaidy «Ult aqparat».
«Almaty qashanda Elbasy men prezidenttiń nazaryn sezinedi jáne bolashaqqa batyl qaraidy. Qala jyldam damýda. Prezident Qasym-Jomart Kemeluly Toqaevtyń sailaý aldyndaǵy baǵdarlamasy jáne onyń almatylyqtardyń ómir súrý sapasyn arttyrý boiynsha bergen tapsyrmasy júieli júzege asýda» dedi Baqytjan Saǵyntaev.
Onyń aitýyna qaraǵanda, 2019 jyldyń 10 aiynyń qorytyndysy boiynsha qala ekonomikasynyń barlyq salalarynda oń dinamika baiqalady. Ónerkásip - 5,1%-ǵa, investitsiia - 3,1%-ǵa, bólshek saýda - 11,8%-ǵa, kóterme taýar ainalymy - 1,3%-ǵa, qurylys 3,2%-ǵa ósti. Turǵyn úidi iske qosý 8,8%-ǵa (1 552,5 myń sharshy metr) ulǵaiǵan.
«Almatylyqtardyń naqtyly tabysy 6,7%-ǵa ósti: biylǵy jyldyń 3 toqsanynda ortasha ailyq jalaqy 220 myń teńgeden asty. Jyl basynan beri 40,4 myń jańa jumys orny ashyldy. Jumyssyz azamattardy jáne NEET sanatyndaǵy jastardy eńbekpen qamtý boiynsha jekelegen jumystar júrgizilýde» deidi ákim.
Sonymen qatar ol, eńbekpen qamtýdyń 12 mobildi ortalyǵy qurylǵanyn atap ótti.
«Qalalyqtardy aýyzsýmen 100% qamtamasyz etý basty máseleniń biri dep esepteimin. 23 yqshamaýdandaǵy 105 myń turǵyndy aýyzsýmen jáne káriz júiesimen qamtamasyz etý úshin barlyq jumystardy 2023 jyly aiaqtaýdy josparlaýdamyz» dep atap ótti Almaty ákimi.
Sonymen qatar, buryn jaryǵy bolmaǵan 208 kóshege syrtqy jaryq ornatýdyń qurylysy aiaqtaldy. Keler jyly 1176 kósheni jaryqtandyrý retteledi. Osylaisha jaryqtandyrýda 100% kórsetkishke qol jetetin bolady.
