Almaty qalasynyń ákimi Baqytjan Saǵyntaev 20 sáýirden bastap qalada qandai nysandar ashylatyndyǵy jáne qaýipsizdik sharalary saqtalmaǵan jaǵdaida olardyń qalai jazalanatyny týraly aitty, dep habarlaidy "Ult aqparat".
«Keshe, memlekettik komissiianyń otyrysynda Almatydaǵy óndiristik nysandardyń 20 sáýirden bastap jumys isteýge daiyn ekenin jetkizdik. Osy ýaqytqa deiin indýstrialdy aimaq toqtaýsyz jumys istedi, búgingi kúnge deiin qurylys materialdaryn shyǵaratyn zaýyt,tamaq, jeńil ónerkásiptiń bir bóligi jumys istep turdy. Endi qalǵan bóligine kelesi aptadan bastap jumys isteýge ruqsat berildi», – deidi Baqytjan Saǵyntaev.
Onyń aitýynsha, qurylysshylardyń ótinishine bailanysty kóterme bazarlar jumysy qalpyna keltiriledi. Megopoliste olardyń sany beseý.
«Sonymen qatar «Atameken» UKP ótinishi boiynsha notariýstar men birneshe halyqqa qyzmet kórsetý ortalyqtarynyń belgili bir bóligi jumys isteidi. Bul qajet, óitkeni qazir memleket tarapynan kórsetilip jatqan kómekter ekinshi deńgeili bankter arqyly júzege asyrylýda. Al, ol jaqqa birneshe qujat qajet», - dep tolyqtyrdy qala ákimi.
Sonymen qatar, ol 20 sáýirden bastap jumys isteitin kásiporyndardyń sanitarlyq talaptardy buljytpai oryndaý kerektigin basa aitty.
«Daiyndyq jumystaryn barlyq kásiporyn basshylary júrgizýi kerek. Qashyqtyq, sanitaizer, maska, qolǵap, jeke saqtaný quraldarymen qamtamasyz etilýi tiis. Dúisenbiden bastap aýdit júrgiziledi. Eger daiyn bolmasa, ol qyzyl karta alady jáne kemshilikterin joimaiynsha ashylmaidy. Aldaǵy ýaqyta da únemi tekserip otyramyz, kemshilikter qaitalanatyn bolsa nysan jabylyp, qaita ashylmaidy. Biz osyndai jazany qoldanamyz», - dedi ákim.
