- Almatyda jolaqy baǵasy kóterilmeidi. Bul týraly qalalyq jolaýshylar kóligi jáne avtomobil joldary basqarmasynyń basshysy Maqsut Isahov habarlady.
Ol atap ótkendei, zańnamaǵa sáikes, atalǵan máseleni qarastyrý quzyretine qalalyq máslihat ie.
«Tasymaldaýshy kompaniialar jergilikti atqarýshy organdarǵa tarifti kóterý jaiyn qarastyrý jaily jii ótinish bildiredi. Alaida, ony qarastyrmas buryn, kompaniialar kiris pen shyǵys, janar-jaǵarmaiǵa, qyzmetkerlerdiń jalaqysyna, qosalqy bólshekterdi satyp alýǵa ketken shyǵyndardyń esepteri men smetalaryn, sonymen qatar tabys kólemin kórsetýi tiis. Jolaýshylar sanyn eseptep, tabysty jáne asa tabysty emes baǵyttardy anyqtaýy tiis», - deidi Maqsut Isahov.
Sheneýniktiń sózine qaraǵanda, atalǵan statistikany sońǵy eki aptada 18 tasymaldaýshy-kompaniianyń 5-ýi ǵana tapsyrǵan.
«Kompaniialardyń kóbi bul máseleni kótermeidi, iaǵni olardyń jaǵdaiy jaman emes. Alaida biz barlyǵyn jiti tekserýimiz kerek. Bul aýqymdy sharýa. Sondyqtan azamattarǵa aitatynym, qazir tarifti ósirý máselesi qaralyp jatqan joq», - dep túidi Almaty qalasynyń jolaýshylar kóligi jáne avtomobil joldary basqarmasynyń basshysy.
Osyǵan deiin birqatar BAQ-ta Almatyda qoǵamdyq kóliktegi jolaqy tarifi ósýi múmkin degen aqparat paida bolǵan.
