20 aqpan kúni Almatyda Toqtabaev pen Súleimenov kósheleriniń qiylysynda jinalǵan bir top adam aiqailap, qaýipsizdik qyzmetkerlerin uryp-soqqan. Muny kórgen turǵyndar úreilenip, sol mańnan tezirek ketýge tyrysqan. Osyǵan bailanysty jergilikti bilik jaǵdaidy túsindirdi, dep habarlaidy QazAqparat.
Onyń videosy áleýmettik jelide tarady.
Beinejazbadan bir top adamnyń kósheniń ortasynda kele jatqanyn kórýge bolady. Olardyń qolynda temir qalqan men taiaq boldy.
Al mundai qorqynyshty kórinisti kórgen turǵyndar shoshyp ketti. Júrgizýshiler jol erejesin buzyp, sol mańnan tezirek ketýge asyqty.
Keiinnen munyń bári túsirilim úshin jasalǵany anyqtaldy.
Alaida «Cultburo» JShS qańtar aiyndaǵy oqiǵalar týraly rolik túsirýge resmi ruqsat almaǵan.
Ákimdiktiń baspasóz qyzmetiniń málimetinshe, 1 aqpanda Almaty qalasy ákiminiń, Áýezov aýdany ákiminiń jáne politsiia departamentiniń atyna «Cultburo» JShS-nen 13 aqpanda «Habar» telearnasynyń tapsyrysy boiynsha qańtardaǵy oqiǵalar taqyrybyna áleýmettik rolik túsirýge ruqsat berý týraly ótinish kelip túsken.
Atalǵan ótinish boiynsha Qoǵamdyq damý basqarmasynyń mamandary ótinish avtorlarymen túsindirý jumystaryn júrgizdi jáne olardy túsirilim júrgizýge ruqsat berilmegeni týraly habardar etti. Politsiia departamentinen de esh ruqsat berilmegen.
Alaida, rolik túsirýge tyiym salynǵanyna qaramastan, «Cultburo» JShS aǵymdaǵy jyldyń 20 aqpanynda beinerolik túsirgen.
