Almatyda kommýnaldyq ótemaqy 119 myń adamǵa beriletin boldy. Bul týraly onlain brifing barysynda qalalyq Energotiimdilik jáne infraqurylymdyq damý basqarmasynyń basshysy Áset Masabaev aitty, dep habarlaidy "Ult aqparat".
Biyl 18 sáýirde QR Indýstriia jáne infraqurylymdyq damý ministrligi Kommýnaldyq qyzmet kórsetýshilerge shyǵyndardy óteý erejesin bekitken bolatyn.
«Buǵan deiin qoldanylyp kelgen erejelerge sáikes, ótinish bildirgen jáne jeke shoty bar mynadai sanattaǵy adamdarǵa berilip keldi. 1-shi, 2-shi, 3-shi toptaǵy múgedekter, múgedek balalardy tárbielep otyrǵan otbasylar, kópbalaly otbasylar, Uly Otan soǵysynyń múgedekteri men qatysýshylary olarǵa teńestirilgen adamdar, memlekettik nemese qoǵamdyq mindetterdi oryndaý, áskeri qyzmet atqarý kezinde, ǵarysh keńistigine ushýdy daiyndaý nemese júzege asyrý kezinde, adam ómirin qutqarý, quqyqtyq tártipti qorǵaý kezinde qaza tapqan adamdardyń otbasylary, eń tómengi jáne odan tómen zeinetaqy alatyn jalǵyzbasty zeinetkerler, ataýly áleýmettik kómek alatyn azamattar alýy tiis bolatyn. Atalǵan sanatqa jatatyn adamdardyń tizimin Áleýmettik ál-aýqat basqarmasy daiyndady. Sáýirde muqtaj jandar sany 62 myń bolǵan. Qazir bul kómekke muqtaj adamdar sany 119 myńǵa jetti. Iaǵni, 2 esege ósti», - dedi Áset Masabaev.
Energotiimdilik basqarmasynyń bailanys ortalyǵynda 148 myń qońyraý tirkelgen. Onyń ishinde 17 505 ótinish maquldandy.
Buǵan deiin tek derbes shot muqtaj adamnyń basyna rásimdelgen jaǵdaida ǵana beriletin bolǵan edi.
Óńirler men Almaty qalasy Erejege osy másele boiynsha ózgerister engizý jóninde usynystar berdi.
Bul ózgeris 2020 jyly 10 mamyrda engizildi.
Ministrliktiń ózgertilgen buiryǵynyń 6-tarmaǵyna sáikes ózderiniń jeke shottary nemese ózderimen birge turatyn otbasy músheleriniń jeke shottary bolǵan kezde kommýnaldyq qyzmetter boiynsha ótemaqy alýǵa quqyly bolady.
«Bul jerde QR «Neke jáne otbasy týraly» kodekstiń 3-babynyń 1-tarmaqshasynda Qazaqstan Respýblikasynyń neke-otbasy zańnamasy: otbasy músheleri: erli-zaiyptylar, ata-analar jáne olardyń balalary arasyndaǵy quqyqtar men mindetterdi, múliktik jáne jeke múliktik emes qatynastardy belgileitini qarastyrylǵan. Osylaisha, Kodekste ata-anasy, erli-zaiyptylar, olardyń balalary otbasy músheleri bolyp tanylǵan, osy oraida Erejede kommýnaldyq qyzmetter tólemderiniń ótelýi úshin muqtaj adamdarmen birge turatyn otbasy músheleri ótinish berýge quqyly dep kórsetiledi», - dedi spiker.
