Almatynyń Almaly aýdanynda turǵyndardyń ótinishimen júzege asyrylǵan nysandarǵa arnalǵan baspasóz týry ótti, dep habarlaidy Ult.kz.
foto:Almaly aýdany
Alǵashqy nysan – qalanyń negizgi jaiaý júrginshiler kósheleriniń biri Panfilov kóshesi boldy. Kún saiyn bul kósheden 10-15 myń adam ótedi, demalys jáne mereke kúnderi bul kórsetkish birneshe esege artady. Aýdan ákimi Arman Shamshinniń aitýynsha, kósheniń joǵary júktemesi men dámhanalar men meiramhanalarǵa taýar jetkizetin avtokólikter kóptigi jol tósemine jáne dekorativti elementterge úlken salmaq túsiredi. Osyǵan bailanysty turǵyndar kósheni jańartýdy ótingen.
foto:Almaly aýdany
2017 jyldan beri alǵash ret jol tósemin jóndeý týraly sheshim qabyldandy. Qyrkúiek aiynda bastalǵan jumystar aiasynda 2 myń sharshy metr kespe tas jańartyldy, 130 jańa oryndyq jáne 2 balalar alańy ornatyldy, sýburqaq jóndeldi. Jasyl aimaq 20%-ǵa keńeitilip, jańa butalar otyrǵyzyldy jáne kógal egildi. Qolónershilerge arnalǵan modýldi úiler, statsionarlyq politsiia beketi jáne zamanaýi «Sapar ortalyǵy» ornatyldy. Almatylyqtar jańartylǵan kósheniń qolaily ári jaily bolǵanyn atap ótti.
foto: Almaly aýdany
Kelesi nysan №136 jalpy bilim beretin mektep boldy. Munda 35 jyldan beri alǵash ret seismikalyq nyǵaitý arqyly kúrdeli jóndeý júrgizildi. Zamanaýi talaptarǵa sai robototehnika, himiia, biologiia, fizika, informatika kabinetteri jańartyldy, sondai-aq uldar men qyzdarǵa arnalǵan tehnologiia kabinetteri men sheberhanalar jabdyqtaldy. Barlyq pán kabinetteri interaktivti paneldermen jáne jańa jihazdarmen jabdyqtalǵan.
Baspasóz týrynyń qatysýshylary 2023 jyly «Halyq qatysatyn biýdjet» baǵdarlamasy aiasynda jańartylǵan «Shyǵys AZTM» skverine de bardy. Bul skverdi kórkeitýdi jańa «Nomad» turǵyn úi kesheniniń turǵyndary usynǵan.
Skverde trenajerler, jaiaý júrginshiler joldary, shamamen 10 myń sharshy metr kógal, gúlder men aǵashtar otyrǵyzylyp, jańa jaryqtandyrý ornatyldy. Bul shaǵyn, biraq óte jaily almatylyq skverge ainaldy.
Qala turǵyny ári «HQB» jobasynyń teń avtory Alena Shin munyń aýdan men almatylyqtardyń maqtanyshy ekenin jetkizdi. «Bul tek skver ǵana emes, jalǵyz jasandy toǵany bar skver bizdiń aýdanda. Josparymyzdy ákimdik mamandarymen bólistik, olar bizge ony júzege asyrýǵa kómektesti. Balalarym únemi osy jerde oinaidy, voleibol alańy da keremet. Barlyq jaǵdai otbasylyq demalys úshin jasalǵan».
Týr barysyndaǵy sońǵy nysan Rozybakiev kóshesiniń boiynda Dúisenov kóshesinen ońtústikke qarai ornalasqan, aýmaǵy 0,49 ga bolatyn jańa skver edi. Buryn bul jerde beibereket saýda oryndary bolǵan, bul jaqyn mańdaǵy úilerdiń turǵyndaryna qolaisyzdyq týdyratyn. Osyǵan bailanysty turǵyndar birneshe ret bazardy alyp tastap, onyń ornyna jasyl aimaq qurýdy suraǵan. Aqyry, burynǵy bazardyń ornyna shamamen 2 myń sharshy metr kógaldy jasyl aimaq, gúlder men aǵashtar otyrǵyzyldy.
Turǵyndar úshin zamanaýi ári sapaly materialdardan jasalǵan oryndyqtar, trenajerler, pergolalar, balalar alańdary men júgirý joldary ornatylǵan. Sondai-aq, avtomatty sýarý jáne jaryqtandyrý júiesi ornatyldy.
«Keshkisin munda óte ádemi, jaryq jaqsy. Biz ótinish berip, jumystardy baqylap júrdik, sondyqtan osynda kelip, tańdanamyz. Bul jerde eresekter men balalardyń jaily ýaqyt ótkizýine barlyq jaǵdai jasalǵan. Buryn terezeni ashý múmkin emes edi, sebebi beibereket bazar boldy, shý men jaǵymsyz iis bolatyn. Endi bul múlde basqa orynǵa ainaldy. Úlken jasyl aimaqtar men pergolalar bárin ásemdep tur. Jai ǵana yńǵaily emes, ádemi oryn boldy», – deidi turǵynnyń biri Ásem Nurǵazina.
2023 jyly Almaly aýdanynda «Halyq qatysatyn biýdjet» baǵdarlamasy aiasynda 34 joba júzege asyrylsa, 2024 jyly 52 joba josparlanǵan.
«Sońǵy jyldary Almatynyń kórkeiýine «Halyq qatysatyn biýdjet» baǵdarlamasy oń áserin tigizip keledi. Jasyl demalys aimaqtary qoǵamdyq keńistikterdi jaqsartýda jáne qalanyń ekologiialyq jaǵdaiyn arttyrýda mańyzdy ról atqarady. Biz árqashan aýdan turǵyndarynyń bastamalaryn qoldaimyz», – deidi aýdan ákimi Arman Shamshin.
