Atyraý oblysyndaǵy Almaǵambet kólinen 507 keli óli balyq jinaldy. Bul týraly Balyq sharýashylyǵy komiteti tóraǵasynyń orynbasary Aian Bahiianov málim etti, dep habarlaidy QazAqparat.
«Biyl Jaiyq ózenine sý kelip, deńgeii kóterilip jatyr. Máselen, 24 sáýirde ózen saǵalaryna sý shyǵa bastady. Al, 26 sáýirde Atyraý qalasynyń mańyndaǵy Bezymiannyi kólinde balyqtyń qyrylý deregi anyqtaldy. Osyǵan bailanysty jergilikti ákimdikten arnaiy komissiia qurylyp, tekserý júrgizildi. Komissiia quramyna jergilikti atqarýshy organnyń ókilderi, Jaiyq-Kaspii oblysaralyq basseindik balyq sharýashylyǵy inspektsiiasynyń mamandary endi. Atalǵan sý aidynynan 65 keli óli balyq jinaldy. Balyqtyń qyrylý deregi Mahambet aýdanyndaǵy Almaǵambet kólinde de tirkeldi. Bul kólden 507 keli óli balyq jinalyp alyndy», - dedi Aian Bahiianov.
Onyń aitýynsha, Inder aýdanynda Jaiyq ózenine taiaý ornalasqan 22 kól bar. Onyń tórteýine sý kelgen. Al, Mahambet aýdanyndaǵy 18 kóldiń altaýynda sý paida boldy.
«Balyqtyń qyrylýynyń basty sebebi - Jaiyq ózeniniń saǵasyna shyǵyp, sý aidynyna qaita orala almaýynan bolyp otyr. Óitkeni, saǵalarǵa sý tez kelgen. Balyqtar sýmen birge shyqqan. Sý keri qaitqanda, ottegi de azaiǵan. Bul balyqtyń qyrylýyna sebep bolǵan», - dedi Aian Bahiianov.
Oblystyq balyq sharýashylyǵy basqarmasynyń basshysy Artýr Sádibekulynyń aitýynsha, Mahambet aýdanyndaǵy Almaǵambet kólinde 10 jyldan beri sý bolmaǵan.
«Bul kólde jyńǵyldyń ósýine sebep boldy. Biyl kólge sý keldi. Kólge sýmen birge kelgen balyq jyńǵyldyń arasynda qalyp qoiǵan», - dedi Artýr Sádibekuly.
Qazir Almaǵambet kólinde balyqtardy qutqarý jumysy jalǵasyp jatyr. Oǵan Jaiyq-Kaspii oblysaralyq basseindik balyq sharýashylyǵy inspektsiiasynan 40 inspektor, Alǵa aýyldyq okrýginen 8 adam tartylǵan.
