12 jastaǵy Álinur Hamzin Slavian bazary-2022 Halyqaralyq balalar mýzykalyq baiqaýynda laýreat atanyp, ekinshi dárejeli diplommen marapattaldy, dep habarlaidy QazAqparat.
Baiqaýdyń birinshi kúni Álinur Hamzin Muqaǵali Maqataevtyń sózine jazylǵan «Qazaǵym-ai» ánin oryndady. Qazylar alqasy jerlesimizdiń ónerine eń joǵarǵy – 70 upai berdi. Al, ekinshi kúni ol Ýiliam «Smoki» Robinsonnyń «Who'sLovin'You» ánin shyrqap, 68 upai enshiledi. Osylaisha, jas ánshi jalpy 138 upai jinap, laýreat atandy. Baiqaýdyń bas júldesin Belarýs ónerpazy Elisei Kasich jeńip aldy.
Álinur Hamzin 2010 jyly Oral qalasynda dúniege kelgen. Búginde ol № 27 mektep-litseiiniń 6-synybynda oqidy. Ónerli búldirshin keiingi 5 jylda respýblikalyq jáne halyqaralyq konkýrstarǵa, telejobalarǵa qatysqan. Atap aitqanda, Parijdegi «Junior Eurovision» baiqaýynda, Tashkenttegi «Roza vostoka» halyqaralyq konkýrsynda laiyqty óner kórsetti.
Ónerpaz «Bala daýysy» telejobasynyń laýreaty, «Altyn mikrofon» halyqaralyq vokaldyq konkýrsynyń, «Boztorgai» Halyqaralyq balalar shyǵarmashylyǵy konkýrsynyń, «Baqytty bala» Halyqaralyq konkýrsynyń diplomanty jáne Dimash Qudaibergenniń «Dears» arnaiy syilyǵynyń iegeri atanǵan.
