Japoniianyń Tokio qalasynda ótip jatqan Paralimpiada oiyndarynda qazaqstandyq Alina Solodýhina para paýerliftingten saiysqa tústi, dep habarlaidy "Ult aqparat".
Ol áielder arasynda 45 keli salmaqta el namysyn qorǵady. Saiys barysynda Alina úsh márte jarys jolyna shyqty. Nátijesinde onyń kórsetkishi 83 kelini shamalady. Osylaisha toǵyz sportshynyń arasynan besinshi orynǵa taban tiredi.
Atalǵan salmaqta nigeriialyq Latifat Tidjani 107 keli salmaqty baǵyndyryp, altyn medal aldy. Ekinshi oryndy qytailyq Tsýige Chje (102 keli) buiyrsa, qola júldeni polshalyq Iýstina Kozdrik (101 keli) enshiledi.
Buǵan deiin qazaqstandyq David Degtiarev erler arasynda 54 keli salmaqta chempion atanǵan edi.
Aita keteiik, Tokio Paralimpiadasy 5 qyrkúiekke deiin sozylady. Atalǵan jarysta elimizdiń atynan barǵan 26 sportshy sporttyń 7 túrinen synǵa túsedi.
Sondai-aq, 2016 jyly Braziliianyń Rio-de-Janeiro qalasynda Zýlfiia Gabidýllina erkin ádispen 100 metrge sýǵa júzýden chempion atansa, sol joly Raýshan Qoishybaeva paýerliftingten áielder arasynda 67 kelide kúmis júlde aldy.
