Túrkistanda álimjettik jasaǵan mektep oqýshylaryna qatysty tergeý amaldary bastaldy. Bul týraly búgin qalalyq bilim bóliminiń basshysy Aqmaral Batyrbekova aitty, dep habarlaidy QazAqparat tilshisi.
«Búgin áleýmettik jelide taraǵan № 31, №18, №11 orta mekteptiń 9-synyp oqýshylarynyń arasyndaǵy álimjettik barlyǵymyz úshin kútpegen jaǵdai bolyp otyr. Tóbeleske qatysýshylar tolyq anyqtalyp, politsiia tarapynan tergeý jumystary bastaldy. Oqiǵa qalamyzdaǵy mekteptiń 9-synyp oqýshylary arasynda sabaqtan tys ýaqytta, iaǵni keshki saǵat 17:00 shamasynda bolǵan. Tergeý barysynda ata-analardyń, mektep basshylarynyń jáne iývenaldy politsiia tobynyń jaýapkershilikteri qaralýda», - dedi Aqmaral Batyrbekova.
Oqiǵa oblystyq bilim basqarmasynyń, oblystyq Politsiia departamentiniń qatań baqylaýyna alynǵan.
Eske salsaq, áleýmettik jelilerde bir top mektep oqýshylarynyń tómengi synyp oqýshylaryna álimjettik jasap, uryp-soqqany týraly video tarap ketti. Bul oqiǵaǵa qatysty Ishki ister ministrligi jaýap berip, álimjettik jasaǵandardyń anyqtalǵandyǵy týraly habarlaǵan bolatyn.
