Jánibek Álimhanuly (12-0, 8 KO) tolyqqandy álem chempiony belbeýin jekpe-jeksiz ielenýi múmkin, dep habarlaidy Vesti.kz portaly Boxingscene.com saityna silteme jasap.
Orta salmaqtaǵy WBO belbeýiniń iegeri Demetriýs Andrade (31-0, 19 KO) qazaqstandyqpen jekpe-jekten bas tartyp, kelesi salmaqqa ótpek. Sol sebepti amerikalyq basylym osyndai paiymǵa kelip otyr.
"Andrade orta salmaqta WBO belbeýi úshin Jánibek Álimhanulymen josparlanǵan jekpe-jekke shyqpaityn boldy. Sanktsiia beretin quzyretti organ bul aiqas qarashanyń ortasynda ótý kerek dep sheshim shyǵarǵan. Al 20 shildede sharttardy kelisý úshin komandalarǵa bir ai ýaqyt bergen.
Bul ýaqyt ótti, biraq kelisimshart jasalmady. BoxingScene.com-ge belgili bolǵandai, Andradeniń komandasy burynǵy josparyna qaita oralmaq, boksshy sýperorta divizionǵa ótip, Zak Parkermen (22-0, 16 KO) aralyq jekpe-jekke shyǵady. Ázirge bul aiqasqa ruqsat joq, óitkeni muny WBO maquldaý kerek.
Sýperorta salmaqtaǵy ýaqytsha chempion ataǵy úshin Andrade - Parker aiqasy Derbi qalasynda mamyrda ótý kerek bolǵan. Alaida Andrade 2 mamyrda jaraqatyna bailanysty jekpe-jekten bas tartty. Osydan keiin bul kezdesýge berilgen sanktsiia keiin qaitarylyp, WBO amerikalyqty orta salmaqtaǵy belbeýin Álimhanulyna qarsy qorǵaýǵa mindettedi", - dep jazady basylym.
