Parlament Májilisiniń jalpy otyrysynda «Salyqtyq bazany búrkemeleýge jáne paidany salyq salý aiasynan alyp ketýge qarsy is-qimyl jasaý maqsatynda salyqtyq kelisimderge qatysty sharalardy oryndaý jónindegi kópjaqty konventsiiany ratifikatsiialaý týraly» zań jobasy maquldandy, dep habarlaidy "Ult aqparat".
Qazaqstan Respýblikasynyń Qarjy ministrligi salyqtardy tóleýden jaltarýǵa qarsy kúreske baǵyttalǵan Ekonomikalyq damý jáne yntymaqtastyq uiymynyń jańa jobasy – BEPS-ke Qazaqstannyń qatysýyna bastama jasady. Bul konventsiia 2016 jyly 24 qarashada qabyldandy jáne oǵan Qazaqstan Respýblikasy 2018 jyly 25 maýsymda qol qoidy.
«Osy halyqaralyq shartqa qosylýdyń mańyzdylyǵy men qajettiligin atap ótkim keledi, óitkeni bul Eýropalyq Odaqtyń direktivasyna sáikes, BEPS jobasynyń barlyq qatysýshylary úshin mindetti shart bolyp tabylady. Bul konventsiia barlyq ekijaqty salyqtyq konventsiialarǵa salyq salýdan jaltarýǵa qarsy is-qimylǵa baǵyttalǵan ózgerister engizedi. Bul rette Kópjaqty konventsiia tek osy konventsiiaǵa qosylǵan memleketterdiń ekijaqty salyqtyq konventsiialaryn qamtidy», - dedi QR Premer-Ministriniń birinshi orynbasary - Qarjy ministri Álihan Smaiylov.
Kópjaqty konventsiiada kózdelgen negizgi ózgerister: birinshiden, zańdy tulǵalardyń qos rezidenttik máselesin sheshý tártibi anyqtalǵan; ekinshiden, kirispe mátini eki memlekette de, atap aitqanda kiris kózi bolatyn memlekette jáne tabys alýshynyń rezidenttigi bolatyn memlekette kiristerdi salyq salýdan bosatý múmkindigin boldyrmaý bóligimen tolyqtyryldy; úshinshiden, eger mámileniń maqsaty tek jeńildikterdi alý bolsa, jeńildikterdi qoldanýdy shekteitin ereje kózdelgen.
«Budan basqa, biz «Atameken» ulttyq palatasy alańynda biznes-qaýymdastyq ókilderimen Kópjaqty konventsiianyń erejelerin túsindirý maqsatynda birneshe ret kezdesý ótkizdik.Bir jaǵynan Kópjaqty konventsiiaǵa qosylý halyqaralyq standarttarǵa sáikes bolýǵa tyrysatyn el retinde Ekonomikalyq yntymaqtastyq jáne damý uiymynyń aldynda Qazaqstannyń mártebesin kóteredi. Ekinshiden, salyq organdarynyń ekijaqty salyq konventsiialarynyń erejelerin qoldaný arqyly qurylǵan salyq shemalarynyń jolyn kesýdegi kúresiniń tiimdiligin arttyrýǵa múmkindik beredi. Konventsiiany iske asyrý memlekettik biýdjetten qarjy shyǵyndaryn talap etpeidi», - dedi Á.Smaiylov.
