Foto: primeminister.kz
Qyzylorda oblysyna jumys sapary aiasynda QR Premer-Ministri Álihan Smaiylov óńirdiń negizgi infraqurylymdyq nysandarynyń jumysyn tekserdi, dep habarlaidy "Ult aqparat" primeminister.kz saityna silteme jasap.
Atap aitqanda, Álihan Smaiylov Qyzylordada 67 MVt elektr qýaty men 341 Gkal/saǵ jylý energiiasyn óndiretin JEO-da boldy. Sondai-aq ol ońtústik óńirlerdi úzdiksiz qýat kózderimen qamtamasyz etýge múmkindik beretin jalpy qýattylyǵy 240 MVt jáne 277 Gkal/saǵ bolatyn jańa jylý elektr ortalyǵynyń qurylys jobasymen tanysty. Sheteldik investitsiialar esebinen iske asyrylyp jatqan jobany 2025 jyly paidalanýǵa berý josparlanýda.
Premer-Ministr jumys istep turǵan JEO ótken ǵasyrdyń 60-shy jyldary salynǵandyqtan, tozyǵy jetkenin atap ótti. Sonymen qatar Memleket basshysynyń tapsyrmasy boiynsha 2025 jylǵa deiin ońtústik óńirlerde bý-gaz qondyrǵylaryn salý boiynsha birqatar joba iske asyrylady.
«El ekonomikasy damýymen qatar ónerkásiptik jáne áleýmettik nysandar da kóptep iske qosylýda, sondyqtan qosymsha energiia kózderin jedel iske qosý qajet. Osy mindetter aiasynda Qyzylorda oblysynda jańa JEO salynady. Bul jobany da ýaqytyly aiaqtaý kerek», — dep atap ótti Álihan Smaiylov.
Úkimet basshysynyń aitýynsha, Qyzylorda oblysyndaǵy tozyǵy jetken elektr jelileriniń máselesin de shuǵyl túrde sheshý kerek, óitkeni olardyń tehnikalyq jai-kúii óńir turǵyndary men ónerkásiptik obektilerin elektr qýatymen qamtamasyz etý sapasyna tikelei áser etedi.
Sondai-aq Úkimet basshysy Syrdariia ózeniniń arnasynda ornalasqan Qyzylorda sý torabynyń jumysymen tanysty. Onyń negizgi qyzmeti ózendegi sý aǵynyn retteý jáne Qyzylorda qalasy, Syrdariia, Jalaǵash jáne Qarmaqshy aýdandarynyń aýmaǵynda ornalasqan 110 myń ga sýarmaly jerdi, 250 myń ga shabyndyq jer men jaiylymdardy sýmen jabdyqtaý bolyp tabylady. 2020 jyly QR Úkimetiniń qaýlysyna sáikes gidrotorapty keshendi qaita qurý bastaldy, ony kelesi jyly aiaqtaý josparlanýda.
Premer-Ministr qazirgi ýaqytta Sý salasyn damytýdyń 2023-2025 jyldarǵa arnalǵan keshendi josparyn ázirleý aiaqtalýǵa jaqyn qalǵanyn, ony iske asyrý investitsiialar tartýǵa jáne birinshi kezektegi problemalyq máselelerdi sheshýge múmkindik beretinin atap ótti.
Sondai-aq Álihan Smaiylov shekaralas eldermen júrgizilgen kelissózderden keiin biyl óńirde sý tapshylyǵyn tómendetýge múmkindikter jasalǵanyn aitty. Sonymen qatar kanaldardy tazartý jáne gidrotehnikalyq qurylystardy jóndeý jumystary júrgizildi, nátijesinde egis alqaptary tolyǵymen sýarmaly sýmen qamtamasyz etildi.
Aldaǵy vegetatsiialyq kezeńde aýyl sharýashylyǵy taýaryn óndirýshilerdi sýarmaly sýmen qamtamasyz etý jónindegi sharalar da qarastyrylǵan. Belgilengen sý limitin alý boiynsha kelissózder jalǵasady.
