QR Premer-Ministri Álihan Smaiylov QHR-dyń QR-daǵy elshisi Chjan Siaomen kezdesti. Bul týraly primerminister.kz saity habarlady.
Saýda-ekonomikalyq, kólik-logistikalyq, AÓK, «jasyl ekonomikany» damytý, tsifrlandyrý, transshekaralyq ózenderdi tiimdi paidalaný jáne t. b. salalardaǵy ekijaqty yntymaqtastyqtyń ózekti máseleleri talqylandy.
Qytaiǵa Qazaqstannan ekologiialyq taza aýyl sharýashylyǵy ónimderin jetkizý kólemin ulǵaitý, sondai-aq shekara mańyndaǵy ózara is-qimyldy odan ári arttyrý perspektivalaryna erekshe nazar aýdaryldy.
Premer-Ministr jetkizý tizbegin qalpyna keltirý, Qazaqstan – Qytai shekarasyndaǵy barlyq avtomobil jáne temirjol ótkizý pýnktteriniń úzdiksiz jumysyn qamtamasyz etý, sonymen qatar QR men QHR arasyndaǵy tikelei áýe qatynasyn qalpyna keltirý qajettiligin atap ótti.
«Memleket basshysy Qazaqstan ekonomikasyn «qaita qaraý» jáne syrtqy basty seriktestermen, sonyń ishinde Qytaimen saýda-ekonomikalyq yntymaqtastyqty jandandyrý jóninde aldymyzǵa birqatar mindet qoidy», — dedi Smaiylov.
Chjan Siao Qazaqstanmen yntymaqtastyq Qytaidyń syrtqy saiasatyndaǵy basym baǵyttardyń biri ekenin atap ótti. QHR Qazaqstannyń senimdi seriktesi bolyp qala beredi jáne qajetti qoldaý men járdem kórsetýge daiyn.
Qytai — Qazaqstannyń iri syrtqy saýda jáne investitsiialyq seriktesteriniń biri. 2021 jyldyń 11 aiynda ekijaqty saýda kólemi $17 mlrd-tan asyp, 13,6%-ǵa ósti.
