QR Premer-Ministri Álihan Smaiylov depýtattyq saýalǵa bergen jaýabynda Jezqazǵan-Ulytaý óńirindegi turǵyndar arasynda onkologiialyq aýrýlardyń kóbeiýine zymyran tasyǵysh bólshekterdiń qulaýy áser etý múmkindigi týraly pikir bildirdi, dep habarlaidy QazAqparat.
«Búgingi tańda zertteý nátijeleri boiynsha alynǵan derekter zymyran-ǵarysh qyzmetiniń tirshilik etý ortasynyń jai-kúiine jáne tasymaldaǵysh zymyrandardan bólinetin bólikterdiń qulaý aýdandarymen shektes aýmaqtaǵy eldi mekender turǵyndarynyń densaýlyǵyna tikelei áserin rastalmaǵanyn kórsetedi. Geptil zymyran otynynyń depýtattyq suraýda sipattalǵan patologiiaǵa qatysy joq. Óitkeni «Proton-M» zymyran tasyǵyshynan bólinetin bólikterdiń qulaityn aýdandarda eldi mekender joq», - dep dedi Álihan Smaiylov depýtattyq saýalǵa bergen jaýabynda.
Onyń aitýynsha, «Proton-M» zymyran tasyǵyshynyń qulaý aýdany Jezqazǵan qalasynan 73,3 shaqyrym jerde ornalasqan.
«Baiqońyr» kesheni boiynsha Qazaqstan-Resei úkimetaralyq komissiiasynyń 2014 jylǵy 24 qarashadaǵy otyrysy aiasynda Qazaqstan Respýblikasynyń qorshaǵan ortasyna ekologiialyq júktemeni azaitý úshin 2017 jyldan bastap geptil jaǵatyn «Proton-M» zymyran tasyǵyshyn ushyrýdy qysqartý (2017 jyly 2-ushyrý operatsiiasy, 2020 jyly taǵy 2 operatsiia qysqartyldy. 2025 jyly 5 – ke deiin) jáne bul sanattaǵy zymyran tasyǵyshtardyń ushýyn múlde toqtatý kózdelgen», - dep jazady Úkimet basshysy.
Jaýapta Jezqazǵan-Ulytaý óńirindegi halyqtyń arasynda onkologiialyq aýrýlardyń artý sebebin zertteý qolǵa alynǵany aitylǵan.
«Sonymen qatar Qaraǵandy oblysynyń Jezqazǵan-Ulytaý óńirindegi onkologiialyq aýrýlardyń ósý sebepterin zertteý maqsatynda Ekologiia, geologiia jáne tabiǵi resýrstar ministriniń 2022 jylǵy 4 naýryzdaǵy 69-Ó buiryǵymen múddeli memlekettik organdarmen jáne óńirdiń jurtshylyq ókilderimen birlesip vedomstvoaralyq komissiia quryldy», - delingen jaýapta.
