QR Premer-Ministri Álihan Smaiylov jumys saparymen Batys Qazaqstan oblysyna keldi. Úkimet basshysy óńirdegi birqatar kásiporyndy, áleýmettik jáne infraqurylymdyq nysandardy aralady, dep habarlaidy "Ult aqparat" Úkimettiń resmi saityna silteme jasap.
Kúni keshe Memleket basshysy Qasym-Jomart Toqaev Úkimetke jáne Batys Qazaqstan oblysynyń ákimdigine óńirdegi joldardy jóndeý boiynsha barlyq qajetti sharany dereý qabyldaýdy tapsyrdy.
Osyǵan bailanysty Úkimet basshysy birinshi kezekte 94 myń turǵyny bar 50 eldi mekendi bailanystyryp otyrǵan «Podstepnoe – Fedorovka – RF shekarasy» avtojolynyń ýchaskesine bardy. Jol Qarashyǵanaq ken ornyna deiin jetedi jáne Reseige tranzittik dáliz bolyp otyr.
Qazirgi ýaqytta kúre joldyń jaǵdaiy óte nashar, ári-beri ótken Qazaqstan men basqa da elderdiń ondaǵan myń azamaty jol azabyn tartyp otyr.
«Kúre joldardyń jaǵdaiy – Batys Qazaqstan oblysyndaǵy eń kúrdeli máselelerdiń biri. Biylǵy jyly biz bul jumystardyń aýqymdy bóligin aiaqtaýymyz kerek. Osydan úsh jyl buryn bastalǵan bul jobalar qarjynyń jetispeýshiliginen bitpei qaldy. Biyl joldardy jóndeýge 15 mlrd teńge kózdelgen, eger jumys qarqynyn tezdetýge tehnikalyq jaǵdai múmkindik berse, qosymsha qarajat bólýge bolady. Biýdjetti naqtylaý kezinde biz «Podstepnoe – Fedorovka – RF shekarasy» avtomobil jolyna arnaiy 6 mlrd teńge qarastyrdyq. Joldardy jóndeý jumystaryn 2022-2025 jyldary aiaqtaý qajet», – dedi Álihan Samiylov.
Úkimet basshysy oblys ákimdigine Indýstriia jáne infraqurylymdyq damý ministrligimen birlesip, bul máseleni baqylaýda ustap, qarajattyń tiimdi igerilýin qamtamasyz etýdi tapsyrdy.
Budan keiin Premer-Ministr ósimdik maiy men kúnjara óndiretin kásiporyn «Poima mai kombinaty» JShS-ǵa bardy.
Zaýytta 135 adam jumys isteidi, al onyń ónimi (jylyna shamamen 50 myń tonna) tek BQO-da jáne kórshiles oblystarda ǵana emes, sondai-aq Túrkimenstanda, Ózbekstanda, Aýǵanstanda, Tájikstanda jáne Reseide suranysqa ie.
2,8 mlrd teńge memlekettik qoldaý alǵan kásiporyn «ainalym shemasy» arqyly baǵany turaqtandyrý saiasatyn iske asyrýǵa belsendi qatysýda, sonyń arqasynda ósimdik maiynyń baǵasy aitarlyqtai tómendedi.
«Ózderińiz biletindei, eldiń azyq-túlik qaýipsizdigin qamtamasyz etý Memleket basshysynyń erekshe baqylaýynda. Osyǵan bailanysty naryqty otandyq aýyl sharýashylyǵy ónimderimen tolyqtyrý boiynsha júieli jumys júrip jatyr. Olardyń ishinde áleýmettik mańyzy bar azyq-túlik taýarlary – birinshi kezekte. Naryqty kúnbaǵys maiymen qamtamasyz etý úshin qaita óńdeý kásiporyndaryn shikizatpen qamtý boiynsha sharalar qabyldanyp jatyr. Osy maqsatta kúnbaǵys tuqymy men kúnbaǵys maiyn shyǵarýǵa kvota engizilgeni belgili», – dedi QR Premer-Ministri.
Jumys saparynyń kelesi nysany úsh aýysymmen oqytýdy joiý sharalary aiasynda iske qosylǵan 300 oqýshyǵa arnalǵan №18 mektep-bóbekjai-balabaqsha kesheni boldy.
Premer-Ministr «Bilimdi ult» ulttyq jobasynda bilim berýdiń qoljetimdiligi men sapasyn qamtamasyz etý úshin qajetti sharalar kózdelgenin atap ótti.
2021 jyly 534 balabaqsha ashyldy. 2022 jyly 138 mekteptiń qurylysyna biýdjetten 104 mlrd teńge bólindi, onyń ishinde BQO-da alty mektepke 1,9 mlrd teńge bólindi. Odan bólek, 2022 jyly respýblikada 1 000 mektep, onyń ishinde BQO-da 63 mektep jańǵyrtylady.
«Sonymen qatar oblys balabaqshalarynda 11 myńnan astam adam kezekte tur, alty apatty jáne úsh aýysymmen oqytatyn úsh mektep bar. Qosymsha bilim boiynsha memlekettik tapsyrysqa qarajat bólingen joq. Ákimdik bul problemalardy jedel sheshýi kerek. Jekemenshik balabaqshalar kóbirek ashylýy kerek. Memlekettik tapsyrys boiynsha qosymsha bilimge jergilikti biýdjetten qarajat bólýdi qamtamasyz etý qajet», – dedi Úkimet basshysy.
Odan keiin Álihan Smaiylov «Oral jylyjai kesheni» JShS qyzmetimen tanysty, onyń jobalyq qýaty jylyna 3 myń tonna qiiar men qyzanaqty quraidy. Kásiporyn «QazAgro» UBH» AQ jelisi boiynsha 5 mlrd teńge memlekettik qoldaýdyń arqasynda iske qosyldy, nátijesinde óńirde jylyjai ónimderin óndirý eki esege artty.
«Kókónistermen qamtamasyz etý máselesinde jylyjai keshenderi mańyzdy ról atqarady, sondyqtan biz olardyń sanyn arttyrýǵa múddelimiz. Bul úshin jylyjai salýǵa jáne ony kútip-ustaýǵa ketetin shyǵyndardy sýbsidiialaýǵa aitarlyqtai qarajat bólinedi. Bul jerde elimizdiń batysyndaǵy iri kásiporyndardyń biri Oral jylyjai kombinaty jumysy mańyzdy ekenin ótkim keledi. Tek óz aimaǵymyzdyń ǵana emes, sonymen qatar kórshi aimaqtardyń naryǵyna shyǵý úshin de kúsh salý qajet. Bul baǵyttaǵy áleýet zor», – dep atap ótti Álihan Smaiylov.
Odan keiin Premer-Ministr «Kvant» JShS jihaz fabrikasyna bardy, onyń ónimderi Qazaqstan ishinde de, syrtqy naryqta da, atap aitqanda, Armeniia men Qyrǵyzstanda suranysqa ie.
Memlekettik qoldaý aiasynda kásiporyn innovatsiialyq jabdyqty satyp alý úshin jyldyq 6%-ben jeńildetilgen nesie aldy. Bul fabrikaǵa naryqtaǵy óz pozitsiiasyn bekitýge jáne óndiristi ulǵaitýǵa múmkindik berdi.
«Ishki naryqtyń qajettiligi jyl saiyn ósip keledi, salany damytý úshin áleýet zor. «Qarapaiym zattar ekonomikasy» baǵdarlamasy aiasynda kásipkerler jeńildikti qarjylandyrýǵa qol jetkize alady, sondyqtan otandyq jihaz óndirýshileri bul múmkindikti belsendi paidalanýy kerek», – dedi QR Premer-Ministri.
