Premer-ministr Álihan Smaiylov balalary qaida oqityny týraly suraqqa jaýap berdi, - dep habarlaidy "Ult aqparat" QazAqparat agenttigine silteme jasap.
Májiliste tilshiler Úkimet basshysynan «eldegi bilim jáne densaýlyq saqtaý salalaryna senesiz be?» dep surady.
«Árine, eldegi bilimge de, densaýlyq saqtaý salasyna da senim artamyz. Jeke ózim jáne otbasym osynda, Qazaqstanda emdelemiz. Men Almatyda ál-Farabi atyndaǵy QazUÝ-da bilim aldym. Balalarym qazir Astanada memlekettik mektepte oqyp jatyr», - dedi Úkimet basshysy tilshilerge bergen suhbatynda.
Buǵan deiin Ǵylym jáne joǵary bilim ministri Saiasat Nurbektiń óz balalaryn Kiprdegi mektepte oqytatyny qoǵamdyq talqyǵa túsken edi.
14 maýsymda ol balalaryn nege shetelde oqytqanyn túsindirip, 26 maýsym kúni otbasyn elge ákeletinin aitqan. Alaida qyrkúiek aiynda Saiasat Nurbek balalarynyń tańdaýyna qurmetpen qaraitynyn, olardyń Kiprde bilim alýdy jalǵastyratynyn jetkizdi.
