Soltústik Qazaqstan oblystyq máslihaty 7 shaqyrylymynyń kezekten tys ótken sessiiasynda Petropavldaǵy bilim berý jáne sport nysandarynyń tórteýine qazaqtyń birtýar uldarynyń esimderin berý týraly sheshim qabyldandy, dep habarlaidy QazAqparat.
SQO máslihat depýtattarynyń aldynda mádeniet, tilderdi damytý jáne arhiv isi basqarmasy bastyǵynyń mindetin atqarýshy Dosbol Ábdirisov baiandama jasap, Petropavldaǵy birqatar nysanǵa Alash ardaqtylarynyń esimin berýdi usyndy.
Atap aitqanda, № 25 jalpy bilim beretin orta mektepke – Alash partiiasynyń jetekshisi, Alashorda úkimetiniń tóraǵasy, pýblitsist, ǵalym, aýdarmashy Álihan Bókeihannyń, № 2 orta mektepke – keńestik memleket, saiasi, mádeniet qairatkeri, respýblikanyń halyq aǵartý komissary bolǵan, Soltústik Qazaqstan óńiriniń týmasy Smaǵul Sádýaqasulynyń, №9 orta mektepke qazaqtyń aqyny, ádebiet zertteýshi ǵalym, pýblitsist, pedagog, aýdarmashy, qoǵam qairatkeri, ulttyq jazýdyń reformatory, aǵartýshy, Alashorda ókimetiniń múshesi - Ahmet Baitursynulynyń esimderin berý usynyldy.
Sondai-aq ulttyq sport túrlerinen oblystyq balalar men jasóspirimder sport mektebin qazaq halqynyń tarihyndaǵy tuńǵysh kásipqoi balýan Qajymuqan esimimen ataý máselesi kóterildi.
SQO máslihat depýtattary usynysty biraýyzdan qabyldady. Endi oblystyq ákimdik janyndaǵy onomastikalyq komissiianyń qaýlysy men oblystyq máslihat sheshimi respýblikalyq onomastikalyq komissiianyń qaraýyna jiberiledi.
Bir jyl buryn Petropavldaǵy óner kolledjine Ermek Serkebaevtyń, oblystyq filarmoniiaǵa Aqan Seriniń esimderi berilgen edi.
Sondai-aq eki aýdandaǵy mektepter Maǵjan Jumabaevtyń jáne Qojabergen jyraýdyń esimimen ataldy.
