«Sybailas jemqorlyqtan ada óńirler» respýblikalyq jobasy qoǵam qoldaýymen ǵana jalpyulttyq qozǵalysqa ainalady. Bul týraly QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev Feisbýktaǵy paraqshasynda jazdy, dep habarlaidy "Ult aqparat".
«Adaldyq, ashyqtyq, jaýapkershilik, esep berýshilik - tek sózder ǵana emes. Bul sybailas jemqorlyqtan azat qoǵamnyń basty qundylyqtary. Qylmystyq sharalar mańyzdy, biraq problemany túbegeili sheshýdi qamtamasyz etpeidi. Tipti ólim jazasy sheneýnikterdiń para alýyn áli de toqtatpaǵan Qytaidyń mysaly osyǵan dálel. Búkil qoǵamnyń aýqymynda sybailas jemqorlyqqa qarsy kózqarasty qalyptastyrý - bul uzaq merzimdi protsess. Biraq jeke deńgeide árqaisymyz ony óte tez jasai alamyz. Eń bastysy - niet pen erik», - dedi ol.
Onyń atap ótýinshe, azamattyq qoǵam anaǵurlym ashyq jáne belsendirek bola bastady. Memlekettik organdardyń janyndaǵy qoǵamdyq keńestermen birge arnaiy monitoringtik toptar memlekettik qyzmetterdiń sapasyn arttyrýǵa aitarlyqtai úles qosýda. Memlekettik kórsetiletin qyzmetterdi alý úshin qolaily jaǵdailar jasaý boiynsha aýqymdy jumystar júrgizilýde. Yńǵaily front-keńseleri bar servistik ákimdikter ashylýda. Formatynda 180-nen astam memlekettik mekeme jumys isteitin open space engizilýde.
«Jaqynda ǵana ony Shymkent qalasynyń ákimdigi de jasady. Kim biledi, múmkin, bul ákimdikter úshin jańa chellendjdiń basy bolar. Biz ázirlegen «Digital Agent» jáne «Ashyq biýdjetterdiń interaktivti kartasy» it-ónimderi Qazaqstandaǵy kez kelgen adamǵa memlekettik servisti jaqsartýǵa jáne uialy telefon arqyly biýdjettiń shyǵystaryn, qurylys sapasyn, joldar jóndeýin baqylaýǵa teńdesi joq múmkindik beredi. Biznes-qoǵamdastyq ta aitarlyqtai damyp keledi. Biznesti jáne investitsiialardy qorǵaýǵa arnalǵan joba sheńberinde bizben 300-den astam kompaniia jumys isteidi. Olar parasyz - adal biznesti júrgizýge ózine mindetteme aldy», - dedi agenttik basshysy.
A.Shpekbaevtyń aitýynsha, óskeleń urpaq arasynda sybailas jemqorlyqqa qarsy kózqarasty damytý úshin elimizdegi barlyq mektepterde «Adal urpaq» klýbtary ashyldy. Kolledjder men joǵarǵy oqý oryndary deńgeiinde akademiialyq adaldyq qaǵidalaryn jáne olardyń qyzmetiniń ashyqtyǵyn nyǵaitýǵa baǵyttalǵan «Sanaly urpaq» jobasy iske asyrylýda.
«Memlekettik qyzmetshilerdiń sanasyn transformatsiialaý maqsatynda Memlekettik basqarý akademiiasy aýyl jáne aýdan ákimderiniń kópshiligin jobalardy basqarý, tiimdi kommýnikatsiialar, etika jáne adaldyqqa úiretti. Sondyqtan, biz olardyń jumysynyń ashyqtyǵy men klientke baǵdarlanýynyń naqty ulǵaiýyn kútemiz. Adal qoǵamdy qurý shaǵyn isterden bastalady. Solardyń biri satýshylary joq adaldyq dúkenderiniń ashylýy boldy. Jarty jyldyń ózinde «Adaldyq dúkeni» oryndarynyń 3700-den astamy ashyldy: memlekettik organdarda, joǵarǵy oqý oryndarynda, mektepterde, sottarda, tipti politsiiada. Satyp alýshylarǵa kedergisiz qyzmet kórsetýdi ashyp jatqan «Ramstor» jáne «Magným» siiaqty tanymal sýpermarketter jelileriniń bizdiń ideiamyzdy qoldaýy qýantady. Árine sizder Almaty metrosyndaǵy adaldyq týrniketi týraly da estigen shyǵarsyzdar. Bul bastama kúsheie túsýde», - dedi ol.
Agenttik basshysynyń paiymynsha, oń ózgerister bar. Jeke jobalar men is-sharalar aýqymdy emes kórinýi múmkin, alaida birge olar ortany jáne qoǵamdyq sanany ózgertetin pazldy quraidy.
«Bizdiń barlyq bastamalarymyz Memleket basshysy ádil atap ótkendei sybailas jemqorlyqqa qarsy kúres memlekettiń ǵana emes, barlyq azamattardyń mindeti degen uǵymdy árbir qazaqstandyqtyń sana-sezimine jetkizýge baǵyttalǵan. Dostar, biz Tuńǵysh Prezidenttiń tapsyrmasyna sáikes «Sybailas jemqorlyqtan ada óńirler» respýblikalyq jobasyn júzege asyrýdamyz #Adaldyq_alany. Memlekettik qyzmettiń sapasyn jaqsartqysy jáne turmystyq sybailas jemqorlyqty joiǵysy kelgen kez kelgen yntasy bar adam oǵan qosyla alady. Tek sizderdiń belsendi qoldaýlaryńyzben ǵana joba jemqorlyqqa qarsy jalpyulttyq qozǵalysqa ainalady», dedi A.Shpekbaev.
