Búgin Sybailas jemqorlyqqa qarsy is-qimyl agenttiginiń alańynda Alik Shpekbaev pen «Ádildik joly» respýblikalyq qoǵamdyq birlestigi keńesiniń tóraǵasy Islambek Saljanov memorandýmǵa qol qoidy, dep habarlaidy "Ult aqparat" atalmysh vedomstvonyń basapsóz qyzmetine silteme jasap.
Yntymaqtastyqtyń maqsaty – sybailas jemqorlyqqa qarsy is-qimyl boiynsha qabyldanatyn sharalardyń tiimdiligin arttyrý, sybailas jemqorlyq quqyq buzýshylyqtar jasaýǵa yqpal etetin sebepter men jaǵdailardy joiýǵa baǵyttalǵan is-qimyldardy ázirleý jáne iske asyrý.
A.Shpekbaev atap ótkendei, «sybailas jemqorlyqqa qarsy qyzmetke qoǵamdy keńinen tartý el basshylyǵy men Agenttiktiń negizgi basymdyǵy bolyp otyr.
Bul – azamattardyń talaptaryna jáne jalpy qabyldanǵan halyqaralyq standarttarǵa jaýap beretin qazirgi zamanǵy sybailas jemqorlyqqa qarsy saiasattyń negizgi alǵysharty. Jemqorlyq – indet, ony joiý bárimizge ortaq mindet».
Sybailas jemqorlyqqa qarsy qyzmet búginde azamattyq qoǵammen syndarly áriptestiktiń úzdik tájiribesin kórsetip otyr. Buǵan «Adaldyq alańy», arnaiy monitoringtik toptar, aqparattyq-aǵartýshylyq shtabtar, «Adal kómek» jobasy men jastardyń sybailas jemqorlyqqa qarsy qozǵalystary siiaqty sybailas jemqorlyqqa qarsy jobalarǵa tartylǵan 100 myńǵa jýyq qoǵam ókilderi – eriktilerdiń qoldaýy dálel boldy.
Óz kezeginde Islambek Saljanov: «Sybailas jemqorlyq bizdiń moraldyq negizderimizge keri áserin tigizip, áleýmettik ádilettiligimizge nuqsan keltiretin jáne elimizdiń áleýmettik-ekonomikalyq damýyn tejeitin qoǵam derti. Álemdik tájiribe kórsetip otyrǵandai, sybailas jemqorlyqpen kúresýdiń negizi sybailas jemqorlyq oryn alyp jatqan oqiǵalarǵa azamattardyń salǵyrt qaramaýynda», – dedi.
Sondai-aq, ol sybailas jemqorlyqty joiý jolynda ár qazaqstandyqtyń qosqan úlesiniń mańyzdylyǵyn atap ótti.
