Ómirge tózimdiliktiń, ómirge degen mahabattyń simvolyna ainalǵan Nik Výichich sekildi Áli de Qazaqstannyń elshisi bola alady. Mádeniet jáne sport ministri Aqtoty Raiymqulova Áli Turǵanbekov jaily osylai aitty, dep habarlaidy QazAqparat.
«Búkil Qazaqstan shydamdylyq pen ómirge degen súiispenshiliktiń úlgisin kórsetip otyrǵan Álige zor maqtanyshpen qaraidy. Biz Áli sekildi balalardy, múmkindigi shekteýli jandardy, kópbalaly otbasylardy qoldaityn azamattarǵa zor qurmetpen qaraimyz. Qarapaiym azamat ári jaýapty organnyń basshysy retinde kómekke muqtaj adamdardy qoldaýǵa barynsha tyrysamyz. Ózderińiz biletindei, halyqaralyq saiystardan oryn alǵan jas órenderimiz jeterlik. Biz olardy bala kezden qoldasaq deimiz. Sondai bolashaǵynan úmitti balalar bizdiń kásibi mektepterde oqýy úshin jumys júrgizýdemiz», - dedi Aqtoty Raiymqulova OKQ-da ótken baspasóz máslihatynda.
Ministr óz sózinde Álimen áli kezdespegenin moiyndady. Aitýynsha, álemge aty shyqqan fýtbol juldyzdarymen dostasqan balamen kezdesý josparynda bar.
«Onyń Ystanbulda bolyp, jeńimpaz Liverpýl komandasymen alańǵa shyqqanyn bilemin. Biz Álimen mindetti túrde kezdesemiz. Ómirge tózimdiliktiń, ómirge degen mahabattyń simvolyna ainalǵan Výichich sekildi Áli de Qazaqstannyń elshisi bola alady. Ol - qazirdiń ózinde bizdiń qazaqstandyqtardyń búkil álemdegi elshisi. Óz tarapymyzdan ony ary qarai da qoldaityn bolamyz», - dedi ministr óz sózinde.
Aqtoty Raiymqulova paraolimpiadalyq sport túrlerine erekshe mańyz berilip kele jatqanyn da aityp ótti.
Eske sala ketsek, qazaqstandyq «Nik Výichich» atanǵan Áli Turǵanbekov óz qolymen aǵylshynnyń Liverpýl oiynshylaryna ÝEFA Sýperkýbogyn tabystaǵan bolatyn.
Jigerli jas balanyń tózimdiligi men órligine Prezident Qasym-Jomart Toqaev ta yqylasyn bildirip jatyr.
