25 sáýirde «Dala Qyrandary» jastar qoǵamdyq birlestigi Astana qalasynyń Dene shynyqtyrý jáne buqaralyq sport akademiiasynyń (APEMS) stýdentterimen kezdesip, Batys Qazaqstan oblysynda sý tasqynymen jáne olardyń saldarymen kúresý naýqanyna erikti retinde qatysýǵa shaqyrdy, dep habarlaidy "Ult Aqparat".
Jiynǵa kelgen stýdentter óz suraqtaryn qoiyp, erikti retinde qalai tirkelýge bolatynyn, qandai talaptar baryn jáne qaýipsizdik máselesin de surap jatty. Uiymdastyrýshylar 18 jastan bastap eriktilerdi ózderine tirkei alatyndaryn jáne olardy irikteý arqyly qabyldaityndaryn baiandady. Tótenshe jaǵdaidan zardap shekken aimaqqa baryp, qol ushyn sozatyn jas azamatty qoǵamdyq birlestik arnaiy kiimmen, jatyn oryn jáne tamaqpen qamtamasyz etpek.
Uiymdastyrýshylar birlestiktiń mindeti men maqsaty týraly aityp, sý tasqynyna qarsy kúreste qandai sharalar atqarǵandaryn jetkizdi.
"Bizdiń maqsatymyz jastardy judyryqtai jumyldyryp, el basyna kún týsa birlik kórsete alatyn, paidaly is tyndyra alatyn belsendi óskeleń urpaqty tárbieleý. Ata zańymyzdy "Otanyn qorǵaý - Qazaqstannyń ár azamatynyń boryshy" dep jazylǵan ǵoi. Iaǵni biz elimizdiń patriottary kóp bolsa degen niettemiz. Biz sportta júrgen jastar birigip, osydan bir jyl buryn «Dala Qyrandary» atty uiym qurdyq. Qazirgi ýaqytta uiymǵa jetpisten astam jas azamat jinalǵan. Biz múshelerimizdi "Qyrandar" dep ataimyz. Biz osy ýaqytqa deiin eki-aq ret múshelikke qabyldaý jasadyq, biraq eriktilerdiń sanyn arttyryp, ary qarai da uiymǵa múshelikke qabyldaýdy jalǵastyramyz degen oidamyn. Qyrandardyń sanyn Astana boiynsha 2000-ǵa deiin jetkizýge tyrysamyz", -deidi birlestik úilestirýshisi Damir Bekbosynov.
«Dala Qyrandary» jastar qoǵamdyq birlestiginiń Týrizm jáne Sport Ministrligimen memorandýmy aiasynda sý basqan Batys aimaqqa elimizge tanymal sportshylar Firýza Sharipova, Daniiar Eleýsinov, Vasilii Tahtai, Erbol Hamitov, Beibit Ystybaev siiaqty azamattar erikti retinde barǵan. Uiymdastyrýshylar "bul jergilikti turǵyndardy jigerlendirdi" degendi aityp otyr.
Dala Qyrandarynyń eriktileri Oral qalasynda boldy jáne Zachagansk, Jelaevo, №1 jáne №2 saiajailardyń mańyndaǵy úiindi bógetterdi nyǵaitýǵa kómektesken. Bul jumystarǵa jalpy 300-den astam MMA, grek-rim jáne erkin kúres, greppling, fýtbol, fýtzal jáne t.b. sport túrleriniń sportshylary erikti túrde jumyldyrylǵan.
Solardyń biri Qazaq kúresiniń palýany Nurǵali Tursynǵaziev Oral qalasynda ahýal óte qiyn, qol ushyn sozatyn eriktiler áli de qajet ekenin aityp otyr.
"Tórt kúndei jumys istep, qoldan dambalar saldyq. Alaida, ókinishtisi olardyń barlyǵyn sý shaiyp ketti. Áli de kómek kúshi kerek. Sý tasqynynan keiin de ol jaqta atqaratyn jumystar bolady. Tazalaý jumystarymen ainalysý kerek. Nege deseńizder qanshama zat aǵyp kelip jatyr. Kún demei, tún demei qyzmet etip jatqan jigitter bar ol jaqta. Jalpy Oral halqy óte uiymshyl eken. Biz jumys istep jatqan kezde ózderiniń kómekterin kórsetip, "sharshap qalmadyńdar ma?" dep shailaryn alyp kelip jatyr. Jastary óte myqty eken. Barlyǵy uiymshyl. Ár túrli baǵyttaǵy jumystarǵa bólinip alyp, jumysyn kórsetip jatyr. Qol qýsyryp otyrǵan adam joq. №2 saiajaidy qazir tolyqtai sý alyp ketti. Ózderińiz kórip otyrǵan shyǵarsyzdar. Sý áli de kóterilip, qoiǵan dambalarymyzdy jyryp ketip jatyr. Bul tabiǵi apat qoi", -degen Nurǵali Tursynǵaziev sý basqan aimaqqa qol ushyn sozýǵa barǵan eriktiler kóp ekenin, alaida sonyń ózinde áli de kómek qajet ekenin jetkizip otyr.
Uiymdastyrýshylardyń sózinshe, «Dala Qyrandary» JQB bir aidan beri sý tasqynynan zardap shekken azamattarǵa kómektesip jatyr.
