Foto: gov.kz
Ǵylym jáne joǵary bilim ministri Saiasat Nurbek bergen diplomdary kásibi biliktilik talaptaryna sai bolmaǵan ýniversitetterden oqý aqysyn qaitaryp alý týraly usynysty qoldamaitynyn aitty, dep habarlaidy "Ult aqparat" Kazinform agenttigine silteme jasap.
«Byltyr Qazaqstanda kásibi biliktilikter týraly jańa zań shyqty. Osy zańdy biz aqyryndap, baiaý engizip jatyrmyz. Bul zań boiynsha mamandyqtar retteletin jáne rettelmeitin mamandyqtar dep ekige bólinedi. Aqyryndap retteletin mamandyqtarǵa da mán berýimiz kerek. Endi keibir mamandyq ielerine eńbek naryǵynda jumys tabý úshin diplom ǵana jetkiliksiz. Syrttai táýelsiz komissiia nemese ortalyq endi ol kisiniń biliktiligin sertifikattaýdan ótkizip rastaý kerek. Qazir osy zańnyń ishinde «Biliktilikti táýelsiz rastaý» degen uǵym bar. Sondyqtan osy jumys aqyryndap-aqyryndap jasalyp kele jatyr. Ony birden engizse, bizdiń túlekterimiz de daiyn emes, joǵary oqý oryndary da daiyn emes – úlken problema bolady. Biraq biyl osy júieni sizdermen synaqtan ótkizýimiz kerek. Ol úshin birneshe joǵary oqý ornyn tańdap alýymyz kerek. Diplom iesiniń biliktiligi rastalmaǵan jaǵdaida ne isteidi? Jumys berýshi oqý bitirgen mamandy diplomymen qabyldamasa, ony oqytqan joǵary oqý orny qandai jaýapkershilik arqalaidy? Grantpen oqysa kim jaýap beredi, aqyly negizde oqysa kim jaýap beredi? Osy siiaqty kóptegen suraq shyǵyp jatyr», - dedi ministr L.Gýmilev atyndaǵy Eýraziia ulttyq ýniversitetinde ótken forýmda.
Saiasat Nurbek depýtattar tarapynan jazalaýdyń qatal túri usynylǵanyn da aityp qaldy.
«Májiliste osyndai bir pikirler aitylyp jatyr. Túlektiń biliktiligi rastalmaǵan jaǵdaida ony oqytqan joǵary oqý orny jazasyn shegý kerek dep otyr. Ol jaza qarjylai turǵyda bolý kerek degen ustanym. Mysaly, Ulybritaniiada túlek táýelsiz emtihan arqyly diplomyndaǵy kásibi biliktiligin rastai alǵan kúnniń ózinde keiin jumysta sol mamannyń kesirinen apat nemese basqa da keleńsiz jait oryn alsa, kompaniiaǵa úlken bir shyǵyn kelse, saqtandyrý tóleminiń 70-80 paiyzyn joǵary oqý orny men biliktilik sertifikatyn bergen táýelsiz institýt tóleidi. Bizdiń institýttar, joǵary oqý oryndary ondaiǵa daiyn ba, daiyn emes pe? Bylai qarasańyz óte qatal usynys. Birden aitaiyn, Májilispen aqyldasyp, ondai sharalardy qoldaǵan joqpyz. Bizdiń qazirgi ustanymymyz - «áli daiyn emespiz». Keiin osyǵan ótýimiz kerek. Synaqtan birneshe ýniversitette ótkizip kóremiz. «Atameken» palatasymen birge, táýelsiz sertifikattaý institýttarymen bir eksperiment jasaýymyz kerek. Strategiiamyz sodan keiin ǵana belgili bolady», - dedi vedomstvo basshysy.
