AQSh-tyń Florida shtatyndaǵy Hollivýd qalasynda ótken boks keshinde qazaqstandyq Áli Ahmedov ekinshi orta salmaqta IBO álem chempiony titýlyn jeńip ala almady, dep habarlaidy "Ult aqparat".
Golovkin-Sheremeta anderkartynda ótken jekpe-jek barysynda qazaqstandyq kásipqoi boksshy, ekinshi orta salmaqtaǵy WBC International Silver chempiondyq belbeýiniń iegeri Áli Ahmedov (16-0, 12 KO) 11 raýnd boiy ekvadorlyq Karlos Gongoradan basymdyq tanytqan bolatyn.
Alaida, 12-raýndta iek astynan aýyr soqqy alǵan Áli nokdaýnǵa túsip qaldy.
Degenmen, tez es jiyp, jekpe-jekti jalǵastyrǵan Qazaqstan boksshysy ekinshi márte de dál sondai apperkottan nokaýtqa tústi.
Osylaisha, buǵan deiingi 18 kezdesýdiń barlyǵynda jeńiske jetip, 13 qarsylasyn nokaýtpen utqan 31 jastaǵy ekvadorlyq Karlos Gongora IBO álem chempiony titýlyn jeńip aldy.
Al Áli Ahmedov kásipqoi boksta alǵash ret jeńildi.
